ന്യൂഡല്‍ഹി: കേന്ദ്രസര്‍ക്കാറിനെതിരെ രൂക്ഷ വിമര്‍ശനവുമായി യു.പി.എ അധ്യക്ഷ സോണിയാ ഗാന്ധി. ഇപ്പോള്‍ രാജ്യം ഭരിക്കുന്നവര്‍ നെഹ്‌റുവിന്റെ പാരമ്പര്യം നശിപ്പിച്ചെന്നും ഇവര്‍ രാജ്യത്തിന് അപമാനമാണെന്നും സോണിയ പറഞ്ഞു. ശശി തരൂര്‍ എഴുതിയ ‘നെഹ്‌റു-ദി ഇന്‍വെഷന്‍ ഓഫ് ഇന്ത്യ’ എന്ന പുസ്തകത്തിന്റെ പുനപ്രകാശന ചടങ്ങില്‍ സംസാരിക്കുകയായിരുന്നു അവര്‍.
ഇന്ത്യയിലെ ജനാധിപത്യത്തെ ഏകീകരിക്കുകയും അടിസ്ഥാന മൂല്യങ്ങളെ ഉറപ്പിക്കുകയും ചെയ്തത് ആദ്യ പ്രധാനമന്ത്രിയായ നെഹ്‌റുവാണ്. ആ മൂല്യങ്ങളിലാണ് ഇന്ത്യ ഇന്നും അഭിമാനിക്കുന്നത്. ഭരണഘടനാ സ്ഥാപനങ്ങള്‍, മതനിരപേക്ഷത, സോഷ്യലിസ്റ്റ് സാമ്പത്തിക നയങ്ങള്‍, ചേരിചേരാ നയം എന്നിവയൊക്കെ നെഹ്‌റു സൃഷ്ടിച്ച മൂല്യങ്ങളാണ്. ഇന്ത്യയുടെ അടിസ്ഥാന കാഴ്ചപ്പാടായ ഈ മൂല്യങ്ങള്‍ ഇന്ന് ചോദ്യം ചെയ്യപ്പെടുന്നു. അദ്ദേഹത്തിന്റെ പാരമ്പര്യങ്ങള്‍ ഇന്ന് രാജ്യം ഭരിക്കുന്നവര്‍ ഓരോ ദിവസവും നശിപ്പിക്കുന്നു. ഇന്ത്യയെ സൃഷ്ടിച്ച നെഹ്‌റുവിനോട് അവര്‍ വെറുപ്പും അവമതിപ്പും കാണിക്കുന്നു. ഏറ്റവും മോശമായതിലേക്ക് അവര്‍ നീങ്ങുന്നു-സോണിയ പറഞ്ഞു.
ജനാധിപത്യത്തെ നശിപ്പിക്കാന്‍ ഇറങ്ങിത്തിരിച്ചവരോട് നിശ്ചയദാര്‍ഢ്യത്തോടെ പോരാടി സുരക്ഷാവലയം തീര്‍ത്ത നെഹ്‌റുവിന് നമ്മള്‍ അര്‍ഹമായ ബഹുമാനം നല്‍കേണ്ടതുണ്ടെന്നും സോണിയാ ഗാന്ധി പറഞ്ഞു.