ന്യൂഡല്‍ഹി: യു.എസ് യാത്രക്കിടെ വിമാനത്തിലിരുന്ന് ഫയല്‍ നോക്കുന്ന ഫോട്ടോ പങ്കുവെച്ചതില്‍ പ്രധാനമന്ത്രി നരേന്ദ്ര മോദിയെ ട്രോളി സേഷ്യല്‍ മീഡിയ. ഒരു നീണ്ട വിമാനയാത്ര നിരവധി ഫയലുകള്‍ പരിശോധിക്കുന്നതിനുള്ള അവസരം കൂടിയാണ് നല്‍കുന്നതെന്നായിരുന്നു മോദി ചിത്രത്തിനൊപ്പം കുറിച്ചത്.
വൈകാതെ ചിത്രം സമൂഹമാധ്യമങ്ങളില്‍ വൈറലായി. തുടര്‍ന്ന് ഇത് ആദ്യത്തെ സംഭവമല്ലെന്നും എല്ലാ പ്രധാനമന്ത്രിമാരും ഇങ്ങനെ ചെയ്യാറുണ്ടെന്നും ചൂണ്ടിക്കാട്ടി നിരവധി കമന്റുകള്‍ സമൂഹ മാധ്യമങ്ങളില്‍ നിറഞ്ഞു. പ്രത്യേക ലൈറ്റിങ് ഒക്കെ നല്‍കിയാണ് ചിത്രം എടുത്തിരിക്കുന്നത്. ചിത്രത്തില്‍ ഫയലിന്റെ അടിയില്‍ നിന്നുള്ള ലൈറ്റിനെ പരിഹസിച്ച് നെറ്റിസണ്‍സ് രംഗത്തെത്തി. ‘എല്ലാവരും ഫയല്‍ നോക്കുന്നത് മുകളില്‍ നിന്നുള്ള ലൈറ്റ് ഉപയോഗിച്ചാണ്. മോദി ഫയല്‍ നോക്കുന്നത് അടിയില്‍ നിന്നുള്ള ലൈറ്റ് കൊണ്ടാണ് ‘എന്നാണ് കമന്റുകളിലെ പരിഹാസം.
ഫോട്ടോക്ക് മിഴിവ് നല്‍കാനാണ് ചുറ്റും ലൈറ്റുകള്‍ നല്‍കിയത്. നരേന്ദ്ര മോദി മാത്രമല്ല, ഇന്ത്യയുടെ മറ്റു പ്രധാനമന്ത്രിമാരും യാത്രകള്‍ ക്രിയാത്മകമായി ഉപയോഗിച്ചിരുന്നുവെന്ന തെളിവുകളുമായി ദേശീയ മാധ്യമമായ ഇന്ത്യന്‍ എക്‌സ്പ്രസും രംഗത്തുവന്നു.
പ്രധാനമന്ത്രിയെന്നത് മുഴുവന്‍ സമയ ജോലിയാണെന്നും വര്‍ഷങ്ങളായി ഇന്ത്യയുടെ പ്രധാനമന്ത്രിമാര്‍ അങ്ങനെ തന്നെയാണ് ചെയ്യാറുള്ളതെന്നുമായിരുന്നു ഇന്ത്യന്‍ എക്‌സ്പ്രസിന്റെ ട്വീറ്റ്. മുന്‍ പ്രധാനമന്ത്രിമാരുടെ പഴയ ചിത്രങ്ങള്‍ കൂടി പങ്കുവെച്ചുകൊണ്ടായിരുന്നു ട്വീറ്റ്. ജവഹര്‍ലാല്‍ നെഹ്‌റു, ലാല്‍ ബഹദൂര്‍ ശാസ്ത്രി, നരസിംഹ റാവു, അടല്‍ ബിഹാരി വാജ്‌പേയി, മന്‍മോഹന്‍ സിംങ് എന്നവരുടെ പഴയകാല ചിത്രങ്ങളാണ് ട്വീറ്റിനൊപ്പം ഇന്ത്യന്‍ എക്‌സപ്രസ് പങ്കുവെച്ചത്.
മോദി മാത്രമല്ല വിമാനത്തിലിരുന്ന് ജോലി ചെയ്ത പ്രധാനമന്ത്രിയെന്ന് ചൂണ്ടിക്കാണിക്കാന്‍ മുന്‍ പ്രധാനമന്ത്രി ഡോ. മന്‍മോഹന്‍ സിങിന്റെ വിദേശ യാത്രാ വേളയിലെ പഴയകാല ചിത്രങ്ങള്‍ കോണ്‍ഗ്രസ് ട്വീറ്റ് ചെയ്തു. വിദേശ യാത്രയ്ക്കിടെ വിമാനത്തിനുള്ളില്‍ വാര്‍ത്താസമ്മേളനം വിളിച്ചുചേര്‍ത്ത മന്‍മോഹന്റെ ചിത്രങ്ങളാണിത്. ചില ചിത്രങ്ങള്‍ പകര്‍ത്താന്‍ വളരെ പ്രയാസമാണന്ന അടിക്കുറിപ്പോടെയാണ് കോണ്‍ഗ്രസിന്റെ ട്വീറ്റ്.