കോഴിക്കോട്: പ്രമുഖ മുസ്്ലിം ലീഗ് നേതാവും സാമൂഹ്യ സേവന രംഗത്തെ പ്രധാനിയുമായിരുന്ന എം.കെ.സി അബു ഹാജിയുടെ പേരിലുള്ള നാലാമത് അവാര്‍ഡ് പ്രവാസി വ്യവസായിയും സഫാരി ഗ്രൂപ്പ് മാനേജിങ് ഡയറക്ടറുമായ സൈനുല്‍ ആബിദീന്‍ സഫാരിക്ക് സമ്മാനിച്ചു.
കോഴിക്കോട് പാരമൗണ്ട് ടവറില്‍ നടന്ന പ്രൗഢഗംഭീരമായ ചടങ്ങില്‍ പ്രതിപക്ഷ നേതാവ് വി.ഡി സതീശന്‍ അവാര്‍ഡ് ദാനം നിര്‍വഹിച്ചു. എം.കെ.സിയുടെ പേരില്‍ ഏര്‍പ്പെടുത്തിയ അവാര്‍ഡ് ഏറ്റവും അര്‍ഹമായ കരങ്ങളിലേക്കാണ് എത്തുന്നതെന്നും ജീവകാരുണ്യരംഗത്ത് നിസ്വാര്‍ത്ഥസേവനം നടത്തുന്ന വ്യക്തിത്വമാണ് സൈനുല്‍ ആബിദീന്‍ സഫാരിയെന്നും പ്രതിപക്ഷനേതാവ് കൂട്ടിച്ചേര്‍ത്തു.
പുരസ്‌കാരദാന ചടങ്ങ് നിയമസഭാ സ്പീക്കര്‍ എ.എന്‍ ഷംസീര്‍ ഉദ്ഘാടനം ചെയ്തു. പാണക്കാട് സയ്യിദ് അബ്ബാസലി ശിഹാബ് തങ്ങള്‍ അധ്യക്ഷനായി. ഇ.ടി മുഹമ്മദ് ബഷീര്‍ എം.പി പൊന്നാട അണിയിച്ചു. വ്യവസായി പി.കെ അഹമ്മദിനു നല്‍കി ഡോ. എം.പി അബ്ദുസ്സമദ് സമദാനി എം.പി ബുള്ളറ്റിന്‍ പ്രകാശനം നിര്‍വഹിച്ചു. ഡോ. എം.കെ മുനീര്‍ എം.എല്‍.എ മംഗളപത്രം സമര്‍പ്പിച്ചു.
കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി പ്രാര്‍ത്ഥന നിര്‍വഹിച്ചു. ഉമര്‍ ഫൈസി മുക്കം, എം.സി മായിന്‍ഹാജി, ഡോ. എന്‍.എ.എം അബ്ദുല്‍ഖാദര്‍, സയ്യിദ് മുബശ്ശിര്‍ തങ്ങള്‍ ജമലുല്ലൈലി, കെ. പ്രവീണ്‍കുമാര്‍, എം.എ റസാഖ് മാസ്റ്റര്‍, പാറക്കല്‍ അബ്ദുല്ല, ടി.പി ചെറൂപ്പ, കമാല്‍ വരദൂര്‍, കെ. മോയിന്‍കുട്ടി മാസ്റ്റര്‍ എന്നിവര്‍ പങ്കെടുത്തു. എം.കെ.സി സ്മാരക സമിതി ചെയര്‍മാന്‍ കെ.മൊയ്തീന്‍ കോയ സ്വാഗതവും ജന.സെക്രട്ടറി സി.പി ഇഖ്ബാല്‍ നന്ദിയും പറഞ്ഞു.