കെ.എസ്.യു പ്രവര്‍ത്തക മിവ ജോളിയെ അക്രമിച്ചതില്‍ പൊലീസ് ഉദ്യോഗസ്ഥര്‍ക്കെതിരെ നടപടി വേണ്ടെന്ന് തീരുമാനം. കളമശേരി സി.ഐയുടേത് സ്വഭാവിക നടപടി മാത്രമാണെന്നും വി.ഐ.പി സുരക്ഷയാണ് ഏറ്റവും പ്രധാനമെന്നും കൊച്ചി സിറ്റി പൊലീസ് വിലയിരുത്തി. മിവയെ പുരുഷ പൊലീസ് കോളറില്‍ പിടിച്ചാണ് വാഹനത്തില്‍ കയറ്റിയത്. സംഭവത്തില്‍ മുഖ്യമന്ത്രിക്കും പൊലീസ് കമ്മീഷണര്‍ക്കും മിവ പരാതി നല്‍കിയിരുന്നു.
സംഭവത്തില്‍ എറണാകുളം ഡി.സി.പി തൃക്കാക്കര എസ്.പിയോട് അന്വേഷണം നടത്തി റിപ്പോര്‍ട്ട് നല്‍കാന്‍ ആവശ്യപ്പെട്ടിരുന്നു. വി.വി.ഐ.പിയുടെ വാഹനം കടന്നുപോകുമ്പോള്‍ അദ്ദേഹത്തിന്റെ സുരക്ഷയാണ് ഏറ്റവും പ്രധാനമെന്നാണ് പൊലീസ് വ്യക്തമാക്കുന്നത്. കളമശ്ശേരി മെഡിക്കല്‍ കോളേജിലെ വ്യാജ ജനനസര്‍ട്ടിഫിക്കറ്റ് വിഷയത്തില്‍ നടപടിയെടുക്കണമെന്ന് ആവശ്യപ്പെട്ടാണ് മുഖ്യമന്ത്രിക്ക് നേരെ യൂത്ത് കോണ്‍ഗ്രസ് പ്രവര്‍ത്തകര്‍ കരിങ്കൊടി ഉയര്‍ത്തി പ്രതിഷേധിച്ചത്.