കൊച്ചി: കൊച്ചിയില്‍ 16 കാരന് ക്രൂരമര്‍ദനം. അമ്മയും മുത്തശ്ശിയും അമ്മയുടെ സുഹൃത്തും ചേര്‍ന്നാണ് കുട്ടിയെ മര്‍ദിച്ചത്. കമ്പികൊണ്ട് കുട്ടിയുടെ കൈ പ്രതികള്‍ തല്ലിയൊടിച്ചു. സംഭവത്തില്‍, കുട്ടിയുടെ അമ്മ രാജേശ്വരി, ഇവരുടെ സുഹൃത്ത് സുധീഷ്, രാജേശ്വരിയുടെ അമ്മ വളര്‍മതി എന്നിവരെ കളമശേരി പൊലീസ് അറസ്റ്റ് ചെയ്തു.
കുട്ടിയെ മര്‍ദിച്ചത് പുറത്ത് വന്നതിന് പിന്നാലെ പ്രതികള്‍ മൂന്നുപേരും നെടുമ്പാശ്ശേരിക്ക് സമീപം ഒരു ലോഡ്ജില്‍ ഒളിവില്‍ താമസിക്കുകയായിരുന്നു. ഇവിടെ നിന്നാണ് പൊലീസ് പ്രതികളെ പിടികൂടിയത്. ഈ മാസം 21നാണ് കേസിനാസ്പദമായ സംഭവം. കുട്ടിയുടെ അമ്മയുടെ സുഹൃത്ത് നിരന്തരം വീട്ടിലെത്തുന്നത് കുട്ടി ചോദ്യം ചെയ്യുമായിരുന്നു. ഇതിനെ തുടര്‍ന്നുണ്ടായ തര്‍ക്കമാണ് മര്‍ദനത്തിലേക്ക് നയിച്ചതെന്നാണ് വിവരം. കയ്യൊടിച്ചതിന് പുറമെ കുട്ടിയുടെ ശരീരത്തില്‍ കത്രിക കൊണ്ട് പ്രതികള്‍ കുത്തി പരിക്കേല്‍പ്പിച്ചിട്ടുണ്ട്.