തിരുവനന്തപുരം: ബാലാവകാശ കമ്മീഷന്‍ നിയമനവുമായി ബന്ധപ്പെട്ട വിഷയത്തില്‍ ആരോഗ്യമന്ത്രി കെ.കെ ശൈലജയുടെ രാജി ആവശ്യപ്പെട്ട് നിയമസഭയില്‍ പ്രതിപക്ഷ ബഹളം.
“ആരോഗ്യമന്ത്രിയെ ബഹിഷ്‌കരിക്കുക” എന്ന ഇന്നലേയെടുത്ത നിലപാട് ഇന്നും പ്രതിപക്ഷം തുടരുകയായിരുന്നു. രാവിലെ ചോദ്യോത്തര വേള ആരംഭിച്ചപ്പോള്‍ തന്നെ പ്ലക്കാര്‍ഡുകളും ബാനറുകളുമായി പ്രതിപക്ഷം ബഹളം വെച്ചു. മന്ത്രി സംസാരിക്കാനായി എഴുന്നേറ്റപ്പോഴായിരുന്നു പ്രതിപക്ഷ അംഗങ്ങള്‍ പ്രതിഷേധത്തിലേക്ക് എത്തിയത്.
ശൈലജ രാജിവയ്ക്കുക, മന്ത്രിസഭയില്‍നിന്ന് മുഖ്യമന്ത്രി ശൈലജയെ പുറത്താക്കുക തുടങ്ങിയ മുദ്രാവാക്യങ്ങളാണ് പ്രതിപക്ഷം ഉയര്‍ത്തിയത്.
ബാലാവകാശ കമ്മീഷന്‍ നിയമനവുമായി ബന്ധപ്പെട്ട് ഹൈക്കോടതി പരാമര്‍ശം വന്ന സാഹചര്യത്തിലാണ് പ്രതിപക്ഷ പ്രതിഷേധം ആരംഭിച്ചത്.
വഷയത്തില്‍ തിങ്കളാഴ്ചയും സഭ പ്രക്ഷുബ്ദമായിരുന്നു.
സ്വാശ്രയ വിഷയത്തില്‍ ഇന്ന് അടിയന്തരപ്രമേയത്തിന് സ്പീക്കര്‍ സമയം അനുവദിച്ചെങ്കിലും പ്രതിപക്ഷം അത് നിഷേധിക്കുകയായിരുന്നു. അടിയന്തര പ്രമേയത്തിന് മുഖ്യമന്ത്രി മറുപടി പറയണമെന്നായിരുന്നു പ്രതിപക്ഷത്തിന്റെ ആവശ്യം. ഇത് അംഗീകരിക്കാതെ ആരോഗ്യ മന്ത്രി മറുപടി പറഞ്ഞതില്‍ പ്രതിഷേധിച്ചാണ് പ്രതിപക്ഷം അടിയന്തരപ്രമേയം അവതരിപ്പിക്കാതെ ബഹളംവെച്ചത്.
വിഷയത്തില്‍ മന്ത്രി ശൈലജ മറുപടി പറയുമെന്ന് സ്പീക്കര്‍ അറിയിക്കുകയായിരുന്നു. എന്നാല്‍ ഹൈക്കോടതി വിമര്‍ശമനത്തിന് മന്ത്രി മറുപടി പറയേണ്ടെന്നായിരുന്നു പ്രതിപക്ഷത്തിന്റെ നിലപാട്.