തിരുവനന്തപുരം: കോവിഡ് രൂക്ഷമായതിനെ തുടര്‍ന്ന് കണ്ടെയ്ന്‍മെന്റ് സോണാക്കിയ സ്ഥലത്ത് കോവിഡ് മാനദണ്ഡങ്ങള്‍ കാറ്റില്‍പറത്തി മന്ത്രി കടകംപള്ളി സുരേന്ദ്രന്. കണ്ടെയ്ന്‍മെന്റ് സോണില്‍ ആള്‍ക്കൂട്ടത്തോടൊപ്പം പരിപാടിയില്‍ പങ്കെടുത്താണ് മന്ത്രി തന്നെ കോവിഡ് മാനദണ്ഡങ്ങള്‍ ലംഘിച്ചത്.
തിരുവനന്തപുരം പാങ്ങപ്പാറ ആശുപത്രിയിലെ ഉദ്ഘാടന പരിപാടിയിലാണ് മന്ത്രി ചട്ടലംഘനം നടത്തിയത്. പരിപാടിയില്‍ തിരുവനന്തപുരം മേയര്‍ കെ ശ്രീകുമാറും പങ്കെടുത്തു.
കൊവിഡ് സാഹചര്യത്തില്‍ തിരുവനന്തപുരം ജില്ലയുടെ മേല്‍നോട്ട ചുമതല കടകംപള്ളി സുരേന്ദ്രനാണ്. ആ ഉത്തരവാദിത്വം വഹിക്കുന്ന മന്ത്രി തന്നെയാണ് ഈ മാനദണ്ഡങ്ങള്‍ ലംഘിച്ചത്. ഫാമിലി ഇന്റഗ്രേറ്റഡ് പദ്ധതിയുടെ ഉദ്ഘാടനമാണ് നടന്നത്. പുറത്തുനിന്നുള്ള മറ്റ് ജനപ്രതിനിധികളും പരിപാടിയില്‍ പങ്കെടുത്തു.
എന്നാല്‍ ഉദ്ഘാടന യോഗത്തില്‍ കര്‍ശനമായി കോവിഡ് പ്രോട്ടോക്കോള്‍ പാലിച്ചതായി മേയര്‍ പറഞ്ഞു. എന്നാല്‍ നാടമുറിക്കല്‍ ചടങ്ങില്‍ ആശുപത്രിയിലെ ആളുകള്‍ ഉണ്ടായിരുന്നതായി അദ്ദേഹം പറഞ്ഞു.