ആലപ്പുഴ: കായംകുളത്ത് സിപിഎം പ്രവര്‍ത്തകനായ സിയാദ് കൊല്ലപ്പെട്ടത് രാഷ്ട്രീയ കൊലപാതകമല്ലെന്ന് മന്ത്രി ജി.സുധാകരന്‍. മാഫിയ സംഘങ്ങള്‍ തമ്മിലുള്ള തര്‍ക്കമാണ് കൊലപാതകത്തിലേക്ക് നയിച്ചതെന്നും മന്ത്രി പറഞ്ഞു. സിയാദിന്റെ കൊലപാതകത്തില്‍ രാഷ്ട്രീയമില്ലെന്നാണ് പൊലീസും പറയുന്നത്. എന്നാല്‍ സിയാദിനെ കോണ്‍ഗ്രസുകാര്‍ കൊലപ്പെടുത്തിയെന്നാണ് സിപിഎം നേതൃത്വത്തിന്റെ പ്രചാരണം. ഇത് തള്ളിക്കൊണ്ടാണ് ഇപ്പോള്‍ മന്ത്രി തന്നെ നേരിട്ട് രംഗത്ത് വന്നിരിക്കുന്നത്.
ചൊവ്വാഴ്ച രാത്രി 10 മണിയോടെ കായംകുളം അഗ്നിരക്ഷാ നിലയത്തിന് സമീപം സുഹൃത്തുക്കളുമായി സംസാരിച്ചു നില്‍ക്കുമ്പോഴാണ് ബൈക്കിലെത്തിയ ക്വട്ടേഷന്‍ സംഘം സിയാദിനെ വെട്ടിവീഴ്ത്തിയത്. സിയാദിനെ ആക്രമിച്ച ക്വട്ടേഷന്‍ സംഘത്തലവന്‍ വെറ്റ മുജീബ് ഉള്‍പ്പെടെയുള്ള പ്രതികളെ പൊലീസ് അറസ്റ്റ് ചെയ്തിരുന്നു. കൊലപാതകത്തില്‍ കോണ്‍ഗ്രസിന് പങ്കില്ലെന്ന് ഡിസിസി പ്രസിഡന്റ് എം.ലിജു നേരത്തെ തന്നെ വ്യക്തമാക്കിയിരുന്നു.