പാരീസ്: കിലിയന്‍ എംബാപ്പേ പുതിയ സീസണില്‍ പി.എസ്.ജി വിടുമോ…? ക്ലബും താരവും ഇത് സംബന്ധിച്ച് വ്യക്തമായി ഒന്നും പറയുന്നില്ല. എംബാപ്പേയോട് തുടരാനും ദീര്‍ഘകാലം ക്ലബിനൊപ്പം വേണമെന്നുമാണ് മാനേജ്‌മെന്റ് ആവശ്യപ്പെട്ടത്. എന്നാല്‍ ദീര്‍ഘകാലമെന്ന വ്യവസ്ഥയോട് യോജിപ്പില്ലെന്ന് താരം വ്യക്തമാക്കി. അടുത്ത സീസണില്‍ എന്തായാലും കളിക്കാം. അതിലപ്പുറം പറയാനാവില്ല എന്ന നിലപാട് വ്യക്തമാക്കപ്പെട്ടതിന് ശേഷം പി.എസ്.ജി മാനേജ്‌മെന്റ് തീരുമാനം പറഞ്ഞിട്ടില്ല.
എംബാപ്പയെ തേടി റയല്‍ മാഡ്രിഡ് ഉള്‍പ്പെടെ വന്‍കിടക്കാര്‍ രംഗത്തുണ്ട്. എന്നാല്‍ പി.എസ്.ജി വിടുന്നതാണ് നല്ലതെന്നും പുതിയ ക്ലബ് തെരഞ്ഞെടുക്കുമ്പോള്‍ ജാഗ്രത വേണമെന്നും എംബാപ്പേക്ക് ലിയോ മെസി ഉപദേശം നല്‍കിയതായി വാര്‍ത്തകള്‍. ലാലീഗയിലേക്കാണ് പോവുന്നതെങ്കില്‍ റയലിനേക്കാള്‍ മെച്ചപ്പെട്ട ക്ലബ് ബാര്‍സിലോണയാണെന്നാണ് മെസി നിര്‍ദ്ദേശിച്ചത്. യൂറോപ്യന്‍ ഫുട്‌ബോളില്‍ ചാമ്പ്യന്‍സ് ലീഗ് ഉള്‍പ്പെടെ വലിയ കിരീടങ്ങള്‍ സ്വന്തമാക്കുന്ന ക്ലബാണ് നല്ലത്. ബാര്‍സയാണ് എന്റെ നിര്‍ദ്ദേശം. റയലിലേക്കാണ് പോവുന്നതെങ്കില്‍ നല്ല ഓഫര്‍ ഉറപ്പാക്കണം. മെസി ഇത്തരത്തിലാണ് പറഞ്ഞതെന്നാണ് ഫ്രഞ്ച് പത്രങ്ങള്‍ റിപ്പോര്‍ട്ട് ചെയ്തത്. മെസിയും എംബാപ്പേയും രണ്ട് സീസണ്‍ പി.എസ്.ജിക്കായി ഒരുമിച്ച് കളിച്ചവരാണ്. ഖത്തര്‍ ലോകകപ്പ് ഫൈനലില്‍ ഇരുവരും നേര്‍ക്കുനേര്‍ വന്നിരുന്നു. എംബാപ്പേ ഹാട്രിക്ക് സ്വന്തമാക്കിയപ്പോള്‍ കിരീടം മെസിക്കായിരുന്നു