അഞ്ചാം പനി പടരുന്നു. കോഴിക്കോട് നാദാപുരം മേഖലയിലാണ് പനി പടരുന്നത്. ഇതുവരെ 24 കേസുകളാണ് റിപ്പോര്‍ട്ട് ചെയ്യപ്പെട്ടിരിക്കുന്നത്. രോഗവ്യാപനത്തെ തുടര്‍ന്ന് പ്രദേശത്ത് പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കി. നാദാപുരം പഞ്ചായത്തില്‍ മാത്രം 18 പേര്‍ക്ക് രോഗബാധയുണ്ട്. ആരോഗ്യവകുപ്പിന്റെ നേതൃത്വത്തില്‍ വാര്‍ഡുകള്‍ തോറും രണ്ട് ദിവസമായി ബോധവത്കരണം നടത്തുന്നുണ്ട്. 340 പേര്‍ നാദാപുരത്ത് വാക്‌സിന്‍ സ്വീകരിക്കാന്‍ ഉണ്ടെന്നാണ് ആരോഗ്യവകുപ്പിന്റെ കണക്ക്. ഇതില്‍ 65 പേര്‍ മാത്രമാണ് കഴിഞ്ഞ ദിവസം നാലു കേന്ദ്രങ്ങളില്‍ നിന്നായി വാക്‌സിന്‍ സ്വീകരിച്ചത്. ജലദോഷം, പനി തുടങ്ങിയ രോഗലക്ഷണങ്ങള്‍ കാണിക്കുന്ന വിദ്യാര്‍ഥികളെ സ്‌കൂളില്‍ അയക്കരുതെന്നും രോഗബാധ സംശയിക്കുന്നവര്‍ ആരോഗ്യവകുപ്പില്‍ വിവരം അറിയിക്കണമെന്നും നിര്‍ദേശം നല്‍കി.