റിയാദ്: കോവിഡ് മുക്തയായ മലയാളി നഴ്‌സ് സഊദി അറേബ്യയില്‍ മരിച്ചു. മലപ്പുറം എടക്കര മുസ്‌ലിയാരങ്ങാടി സ്വദേശി നസീമ ആണ് ജിദ്ദ ആശുപത്രിയില്‍ വച്ച് മരിച്ചത്. 43 വയസായിരുന്നു. വൃക്ക രോഗിയായിരുന്നതിനാല്‍ ഒരു വര്‍ഷം മുമ്പ് വൃക്ക മാറ്റിവക്കല്‍ ശസ്ത്രക്രിയ നടത്തിയിരുന്നു. മറ്റു ശാരീരിക പ്രശ്‌നങ്ങളും ഇവര്‍ക്കുണ്ടായിരുന്നു. ഇതേ തുടര്‍ന്നാണ് ആശുപത്രിയില്‍ പ്രവേശിപ്പിച്ചിരുന്നത്.
ജിദ്ദ കിങ് ഫഹദ് ആശുപത്രിയില്‍ സ്റ്റാഫ് നഴ്‌സായ നസീമക്ക് രണ്ട് മാസം മുമ്പാണ് കോവിഡ് ബാധിച്ചത്. പിന്നീട് പൂര്‍ണമായും ഭേദമാവുകയും ചെയ്തു. മൂന്നാഴ്ചയായി ആശുപത്രിയില്‍ വെന്റിലേറ്ററിലായിരുന്നു. ഭര്‍ത്താവ് ഷാഹിദ് റഹ്മാന്‍. ഏക മകന്‍ യാസീന്‍.