കെ.എസ്.ആര്‍.ടി.സി ബസ് ടെര്‍മിനല്‍ കം ഷോപ്പിംഗ് കോംപ്ലക്‌സ് നിര്‍മ്മാണം പൂര്‍ത്തീകരിക്കുന്നതിനായി എം.എല്‍.എയുടെ 2022-23 വര്‍ഷത്തെ മണ്ഡലം ആസ്തി വികസന ഫണ്ടില്‍ നിന്നനുവദിച്ച രണ്ട് കോടി രൂപയുടെ പ്രവൃത്തികള്‍ സെപ്റ്റംബര്‍ ആദ്യവാരത്തില്‍ ആരംഭിക്കുമെന്ന് പി. ഉബൈദുള്ള എം.എല്‍.എ അറിയിച്ചു.
നിര്‍മ്മാണ പ്രവൃത്തികള്‍ ആരംഭിക്കുന്നത് സംബന്ധിച്ച് മുന്‍സിപ്പല്‍ ഗസ്റ്റ് ഹൗസില്‍ വിളിച്ചു ചേര്‍ത്ത യോഗം പി. ഉബൈദുള്ള എം.എല്‍.എ ഉദ്ഘാടനം ചെയ്തു. നഗരസഭാ ചെയര്‍മാന്‍ മുജീബ് കാടേരി അധ്യക്ഷത വഹിച്ചു.
പാര്‍ക്കിംഗ് ഗ്രൗണ്ട് ഇന്റര്‍ലോക്കിംഗ് സമയത്ത് നഗരസഭ ബസ് സ്റ്റാന്‍ഡില്‍ വാഹനങ്ങള്‍ പാര്‍ക്ക് ചെയ്യും. ഗാരേജിലേക്കും റാമ്പിലേക്കുമുള്ള വാഹനങ്ങളുടെ പ്രവേശനത്തിന് ആവശ്യമായ ക്രമീകരണങ്ങള്‍ വരുത്തും. കണ്‍സള്‍ട്ടിംഗ് ഏജന്‍സിയായ കെ.റെയിലുമായി ബന്ധപ്പെട്ട നടപടി ക്രമങ്ങള്‍ ഉടന്‍ പൂര്‍ത്തീകരിക്കും. ജല ലഭ്യത ഉറപ്പു വരുത്തുവന്‍ ഭൂഗര്‍ഭ ജല വകുപ്പുമായി ബന്ധപ്പെട്ട് കാര്യങ്ങള്‍ പുരോഗമിക്കുകയാണെന്നും കെ.എസ് ആര്‍ ടി.സി അധികൃതര്‍ അറിയിച്ചു.
മലപ്പുറം കെ.എസ്.ആര്‍.ടി.സി ബസ് ടെര്‍മിനല്‍ കം ഷോപ്പിംഗ് കോംപ്ലക്‌സിന്റെ നിര്‍മ്മാണ പ്രവൃത്തികള്‍ 2016 ജനുവരിയിലാണ് ആരംഭിച്ചത്. ആദ്യഘട്ടമായി അനുവദിച്ച 7.90 കോടി ചെലവഴിച്ച് ഗ്രൗണ്ട് ഫ്‌ലോര്‍ ഉള്‍പ്പെടെ നാലു നില കെട്ടിടത്തിന്റെയും ബസ് ബേയുടെയും പ്രവൃത്തികള്‍ പൂര്‍ത്തിയായി. ബാക്കി പദ്ധതി പൂര്‍ത്തീകരണത്തിനാണ് രണ്ട് കോടി രൂപ എം.എല്‍.എ ഫണ്ടില്‍ നിന്നും അനുവദിച്ചത്. 90 ലക്ഷത്തിന്റെ കെ.എസ്.ആര്‍.ടി.സി ഫണ്ടുപയോഗിച്ചുള്ള സിവില്‍- ഇലക്ട്രിക്കല്‍ പ്രവൃത്തികള്‍ അന്തിമ ഘട്ടത്തിലാണ്.
ജില്ലാ ആസ്ഥാനമായ മലപ്പുറം ടൗണിന്റെ ഹൃദയഭാഗത്ത് സ്ഥിതി ചെയ്യുന്ന കെ.എസ്.ആര്‍.ടി.സി സബ് ഡിപ്പോയോട് അനുബന്ധിച്ചുള്ള ഷോപ്പിംഗ് കോംപ്ലക്‌സിന്റെ പണികള്‍ പൂര്‍ത്തീകരിക്കുന്നതോടെ കെ.എസ്.ആര്‍.ടി.സി ക്ക് നല്ല വരുമാന മാര്‍ഗമാവും. ജില്ലാ ആസ്ഥാനത്തിന്റെ മുഖച്ഛായ മാറും.
യോഗത്തില്‍ നഗരസഭ സ്ഥിരം സമിതി അധ്യക്ഷന്മാരായ സിദ്ദീഖ് നൂറേങ്ങല്‍, കെ.മറിയുമ്മ ശരീഫ്, സി.പി. ആയിഷാബി, കൗണ്‍സിലര്‍ മാരായ ഒ.സഹദേവന്‍, ശിഹാബ് മൊടയങ്ങാടന്‍ , പി എസ് എ. ശബീര്‍, ജില്ലാ ട്രാന്‍സ്‌പോര്‍ട്ട് ഓഫീസര്‍ സി.നിഷില്‍ ഹാരിസ് ആമിയന്‍,എം.പി മുഹമ്മദ് , പി.കെ. ബാവ പി.സി. വേലായുധന്‍ കുട്ടി, പി.വി. ഉണ്ണികൃഷ്ണന്‍ , ശ്യാമള. കെ.എസ്., വിവിധ യൂണിയന്‍ പ്രതിനിധികളായ എ.കെ.ജയന്‍, എന്‍.കെ.എം ഫൈസല്‍, പി.അനില്‍കുമാര്‍ കോണ്‍ട്രാക്ടര്‍ സുല്‍ഫിക്കര്‍ കോഴിക്കോട് എന്നിവര്‍ പങ്കെടുത്തു.