അബുദാബി: പ്രമുഖ വാണിജ്യശൃംഗലയായ അല്‍ശംഖ മാളില്‍ ലുലു ഹൈപ്പര്‍മാര്‍ക്കറ്റ് പ്രവര്‍ത്തനമാരംഭിച്ചു. അല്‍വത്ബ മുനിസിപ്പാലിറ്റി ഡയറക്ടര്‍ ഹസന്‍ അലി അല്‍ദാഹിരി ഉല്‍ഘാടനം നിര്‍വ്വഹിച്ചു. ലുലു ഇന്റര്‍നാഷണല്‍ ഗ്രൂപ്പ് ചെയര്‍മാന്‍ ആന്റ് മാനേജിംഗ് ഡയറക്ടര്‍ യുസുഫലി എംഎ, എക്‌സിക്യൂട്ടീവ് ഡയറക്ടര്‍ അഷറഫലി എംഎ, ലുലു ഹൈപ്പര്‍മാര്‍ക്കറ്റ് ഡയറക്ടര്‍ ടിപി അബൂബക്കര്‍, മുനിസിപ്പാലിറ്റി പ്രോപ്പര്‍റ്റീസ് ഡയറക്ടര്‍ സുല്‍ത്താന്‍ ഹുവായര്‍, ഡപ്യൂട്ടി ഡയറക്ടര്‍ മുഹമ്മദ് ഇബ്രാഹിം അല്‍സബ്ബാഗ് എന്നിവര്‍ സന്നിഹിതരായിരുന്നു.
52,250 ചതുരശ്രഅടി വിസ്തീര്‍ണ്ണത്തിലാണ് പുതിയ ഹെപ്പര്‍മാര്‍ക്കറ്റ് തുറന്നിട്ടുള്ളത്. അബുദാബി നഗരത്തില്‍നിന്നും അമ്പതോളം കിലോമീറ്റര്‍ അകലെയാണ് അല്‍ശംഖ മാള്‍ സ്ഥിതി ചെയ്യുന്നത്. ലുലു ഇന്റര്‍നാഷണല്‍ ഗ്രൂപ്പ് കൂടുതല്‍ ഹൈപ്പര്‍മാര്‍ക്കറ്റുകള്‍ ആരംഭിക്കുമെന്നും യുഎഇ വിഷന്‍ 2030 എന്ന ആശയത്തില്‍ ലുലുവിന്റെ പങ്ക് ശ്രദ്ധേയമായിരിക്കുമെന്നും ലുലു ഇന്റര്‍നാഷണല്‍ ഗ്രൂപ്പ് ചെയര്‍മാന്‍ ആന്റ് മാനേജിംഗ് ഡയറക്ടര്‍ യുസുഫലി എംഎ പറഞ്ഞു.