കുവൈത്ത്: കുവൈത്തില്‍ പുതിയ ലുലു ഫ്രഷ് മാര്‍ക്കറ്റ് പ്രവര്‍ത്തനമാരംഭിച്ചു. കുവൈത്ത് രാജകുടുംബാംഗവും അന്തരിച്ച മുന്‍ അമീര്‍ ശൈഖ് സബാഹ് അല്‍ അഹമ്മദ് അല്‍ ജാബറിന്റെ മകനുമായ ശൈഖ് ഹമദ് അല്‍ ജാബര്‍ അല്‍ അഹമ്മദ് അല്‍ സബാഹ് ലുലു ഗ്രൂപ്പ് ചെയര്‍മാന്‍ എം.എ.യൂസഫലിയുടെ സാന്നിധ്യത്തില്‍ ഉദ്ഘാടനം നിര്‍വ്വഹിച്ചു.
കുവൈത്തിന്റെ ഹൃദയഭാഗമായ സഫാത്ത് സ്‌ക്വയറിനും കുവൈത്ത് ലിബറേഷന്‍ ടവറിനും സമീപം ജൗഹറത്ത് അല്‍ ഖലീജിലാണ് പുതിയ ലുലു സ്റ്റോര്‍ പ്രവര്‍ത്തനാരംഭിച്ചിട്ടുള്ളത്. 25,000 ചതുരശ്രയടി വിസ്തീര്‍ണ്ണമുള്ള ലുലു സ്റ്റോര്‍ ലുലു ഗ്രൂപ്പിന്റെ കുവൈത്തിലെ പതിമൂന്നാമത്തെ സ്ഥാപനമാണ്.
ഈ വര്‍ഷാവസാനത്തോടെ അബ്ബാസിയ, ജാബര്‍ അല്‍ അഹമദ് സിറ്റി ഉള്‍പ്പെടെ നാല് പുതിയ ഹൈപ്പര്‍മാര്‍ക്കറ്റുകള്‍ ആരംഭിക്കുമെന്ന് ലുലു ഗ്രൂപ്പ് ചെയര്‍മാന്‍ എംഎ യൂസഫലി വ്യക്തമാക്കി. കുവൈത്ത് ഭരണാധികാരികള്‍ നല്‍കി വരുന്ന പിന്തുണയ്ക്ക് നന്ദി പറയുന്നതായി അദ്ദേഹം പറഞ്ഞു.
ലുലു ഗ്രൂപ്പ് ചീഫ് എക്‌സിക്യൂട്ടീവ് ഓഫിസര്‍ സൈഫി രൂപാവാല, ലുലു കുവൈത്ത് ഡയറക്ടര്‍ മുഹമ്മദ് ഹാരിസ്, ലുലു കുവൈത്ത് റീജിയണല്‍ ഡയറക്ടര്‍ ശ്രീജിത്ത് എന്നിവരുംസംബന്ധിച്ചു