വിജയവാഡ: യുവതിയുടെ ശരീരത്തിലേക്ക് മുന്‍ കാമുകന്‍ തീകൊളുത്തി. തീപടര്‍ന്നതോടെ യുവാവിനെ യുവതി ചേര്‍ത്തുപിടിച്ചതോടെ രണ്ടുപേരും മരിച്ചു. നേഴ്‌സായ ചിന്നാരി(24) മുന്‍ കാമുകന്‍ ജി. നാഗഭൂഷണം(25) എന്നിവരാണ് മരിച്ചത്. ആന്ധ്രപ്രദേശിലെ വിജയവാഡ ഹനുമാന്‍പേട്ടില്‍ തിങ്കളാഴ്ച രാത്രിയായിരുന്നു സംഭവം.
കോവിഡ് കെയര്‍ സെന്ററിലെ നേഴ്‌സായിരുന്നു ചിന്നാരി. തിങ്കളാഴ്ച രാത്രി ചിന്നാരി കോവിഡ് സെന്ററില്‍നിന്ന് മടങ്ങുന്നതിനിടെയാണ് യുവാവ് തീകൊളുത്തിയത്. ഇരുവരും പ്രണയത്തിലായിരുന്നു. വീട്ടുകാര്‍ എതിര്‍ത്തതോടെ ചിന്നാരി ബന്ധത്തില്‍ നിന്നും പിന്‍മാറി. ഇതിനെ തുടര്‍ന്ന് നാഗഭൂഷണത്തിന് വൈരാഗ്യമുണ്ടാവുകയായിരുന്നു.
റോഡില്‍വെച്ച് ചിന്നാരിയും നാഗഭൂഷണവും തമ്മില്‍ ആദ്യം വാക്കേറ്റമുണ്ടായി. ഇതിനുപിന്നാലെയാണ് യുവാവ് കൈയില്‍ കരുതിയ മണ്ണെണ്ണ യുവതിയുടെ ദേഹത്ത് ഒഴിച്ച് തീകൊളുത്തിയത്. ശരീരത്തില്‍ തീപടര്‍ന്നതോടെ യുവതി നാഗഭൂഷണത്തെ പിടിച്ചുവെച്ച് തന്റെ ശരീരത്തോട് ചേര്‍ത്തുപിടിച്ചു. ഇതോടെ യുവാവിനും ഗുരുതരമായി പൊള്ളലേറ്റു. ചിന്നാരി സംഭവസ്ഥലത്തുവെച്ചും 80 ശതമാനത്തോളം പൊള്ളലേറ്റ നാഗഭൂഷണം ആശുപത്രിയിലുമാണ് മരിച്ചത്.
ചിന്നാരി ബന്ധത്തില്‍നിന്ന് പിന്മാറിയതോടെ നാഗഭൂഷണം യുവതിയെ ശല്യം ചെയ്യുന്നത് തുടര്‍ന്നു. തന്നോടൊപ്പം ഒളിച്ചോടാനും യുവതിയെ നിര്‍ബന്ധിച്ചു. ശല്യം രൂക്ഷമായതോടെ രണ്ടുമാസം മുമ്പ് മുന്‍കാമുകനെതിരേ പരാതി നല്‍കിയിരുന്നു. തുടര്‍ന്ന് പൊലീസ് ഇയാളെ വിളിച്ചുവരുത്തി താക്കീത് ചെയ്തു. ഇനി ശല്യം ചെയ്യില്ലെന്ന ഉറപ്പിന്മേലാണ് യുവതി പരാതി പിന്‍വലിച്ചത്. എന്നാല്‍ ഇതിനുശേഷം യുവാവ് ഏറെ വിഷമത്തിലായിരുന്നുവെന്നും ഇതാണ് ആക്രമണത്തിലേക്ക് നയിച്ചതെന്നും പൊലീസ് പറഞ്ഞു.