തിരുവനന്തപുരം: സംസ്ഥാനത്ത് ഇന്നും നാളെയും സമ്പൂര്‍ണ്ണ ലോക്ഡൗണ്‍. വാരാന്ത്യ ലോക്ക്ഡൗണിന്റെ ഭാഗമായി രണ്ട് ദിവസവും കടുത്ത നിയന്ത്രണങ്ങള്‍ ഏര്‍പ്പെടുത്തും. ആവശ്യമേഖലയ്ക്ക് നിയന്ത്രണമില്ല.
സംസ്ഥാനത്ത് ലോക്ഡൗണിന് ഇളവുകള്‍ പ്രഖ്യാപിച്ചെങ്കിലും വാരാന്ത്യത്തിലെ സമ്പൂര്‍ണ്ണ ലോക്ഡൗണ്‍ തുടരാനാണ് തീരുമാനിച്ചത്. ഇന്നും നാളേയും സ്വകാര്യബസുകള്‍ സര്‍വീസ് നടത്തില്ല. കെഎസ്ആര്‍ടിസി പരിമിതമായി സര്‍വീസ് നടത്തും.
അവശ്യസാധനങ്ങള്‍ വില്‍ക്കുന്ന കടകള്‍ രാവിലെ 7 മണി മുതല്‍ വൈകിട്ട് ഏഴ് മണി വരെ പ്രവര്‍ത്തിക്കും. ആരാധനാലയങ്ങള്‍ തുറക്കാം. ആരാധനാലങ്ങളിലേക്ക് പോകുന്നവരെ തടയരുതെന്ന് പൊലീസിന് നേരത്തെ നിര്‍ദേശം നല്‍കിയിട്ടുണ്ട്. രോഗസ്ഥിരീകരണ നിരക്ക് 12 ശതമാനത്തില്‍ താഴെയുള്ള മേഖലകളില്‍ ലോക്ഡൗണ്‍ മാനദണ്ഡങ്ങള്‍ പാലിച്ച് 15 പേര്‍ക്ക് വീതം പ്രാര്‍ഥനയില്‍ പങ്കെടുക്കാം.