സംസ്ഥാനത്തിന്റെ ക്രമസമാധാന നില മുന്‍പെങ്ങുമില്ലാത്ത വിധം താറുമാറായിരിക്കുകയാണെന്ന് മുസ്‌ലിം ലീഗ് നേതാവ് പികെ കുഞ്ഞാലിക്കുട്ടി. സംസ്ഥാനത്ത് ക്രമ സമാധാനം പുനസ്ഥാപിക്കണമെന്നും, പിണറായി വിജയന്‍ ആഭ്യന്തര വകുപ്പ് ഒഴിയണമെന്നും ആവശ്യപ്പെട്ട് യു.ഡി. എഫ് ആഹ്വാനം ചെയ്ത ധര്‍ണ കോഴിക്കോട് കളക്ടറേറ്റിന് മുന്നില്‍ ഉദ്ഘാടനം ചെയ്തത് സംസാരിക്കുകയായിരുന്നു കുഞ്ഞാലിക്കുട്ടി.
ഗുണ്ടകളും, അക്രമവാസനയുള്ളവരും നാട്ടില്‍ സൈ്വര്യ വിഹാരം നടത്തുന്നത് ജനങ്ങളുടെ സാധാരണ ജീവിതത്തിന് മേല്‍ വലിയ വെല്ലുവിളിയായിരിക്കുകയാണ്. ഇതില്‍ നിന്നൊക്കെ ജനങ്ങളുടെ ജീവനും, സ്വത്തിനും സംരക്ഷണമൊരുക്കേണ്ട പോലീസ് നിഷ്‌ക്രിയമാണ് എന്ന് മാത്രമല്ല പോലീസ് അതിക്രമങ്ങള്‍ വ്യാപകമാകുന്നത് സേനയുടെ അന്തസ്സിന് മങ്ങലേല്‍പിക്കുകയും ചെയ്തിരിക്കുന്നുവെന്നും പറഞ്ഞു.
ആഭ്യന്തരവകുപ്പ് തീര്‍ത്തും പരാജയമാണെന്ന് നിസ്സംശയം പറയേണ്ടി വന്നിരിക്കുന്നുവെന്നും ഇത് വളരെ ഗൗരവമായ കാര്യമാണെന്നും കുഞ്ഞാലിക്കുട്ടി ഓര്‍മപ്പെടുത്തി.