ലഡാക്ക്: അതിര്‍ത്തി കടന്നെത്തിയ ചൈനീസ് സൈനികനെ ഇന്ത്യന്‍ സേന പിടികൂടി. ലഡാക്കിലാണ് സംഭവം. സൈനികന്‍ അബദ്ധത്തില്‍ അതിര്‍ത്തി കടന്നെത്തിയതാണെന്നും തിരികെ ചൈനീസ് സേനയ്ക്ക് കൈമാറുമെന്നും സര്‍ക്കാര്‍ വൃത്തങ്ങള്‍ അറിയിച്ചു.
ചുമാര്‍ഡെംചോക്ക് പ്രദേശത്ത് നിന്നാണ് സിവില്‍ സൈനിക രേഖകളുമായി ചൈനയുടെ പീപ്പിള്‍സ് ലിബറേഷന്‍ ആര്‍മി സൈനികനെ പിടികൂടിയത്.
മെയ് മുതല്‍ ലഡാക്കിലെ യഥാര്‍ത്ഥ നിയന്ത്രണ രേഖയില്‍ ഇന്ത്യ ചൈനീസ് സൈനിക സംഘര്‍ഷം നിലനില്‍ക്കുകയാണ്. ജൂണില്‍ ഗാല്‍വാന്‍ വാലിയില്‍ ചൈനീസ് സൈന്യം നടത്തിയ ആക്രമണത്തില്‍ 20 ഇന്ത്യന്‍ സൈനികര്‍ കൊല്ലപ്പെട്ടിരുന്നു.
ഇന്ത്യ ചൈന അതിര്‍ത്തി സംഘര്‍ഷം പരിഹരിക്കുന്നതിന് ഇരുരാജ്യങ്ങളും തമ്മില്‍ നിരവധി തവണ സൈനിക, നയതന്ത്ര ചര്‍ച്ചകള്‍ നടന്നിട്ടുണ്ടെങ്കിലും സ്ഥിതിഗതികള്‍ പുനഃസ്ഥാപിക്കാനായിട്ടില്ല. അതിര്‍ത്തിയില്‍ നിന്നും പിന്‍മാറുന്നതിനുള്ള കരാറുകള്‍ പാലിക്കാന്‍ ചൈന ഇതുവരെ സമ്മതിച്ചിട്ടില്ല.