സംസ്ഥാന സര്‍ക്കാരിന്റെ കോവിഡ് പ്രതിരോധ പ്രവര്‍ത്തനങ്ങളുടെ ഭാഗമായി ജീവന്‍രക്ഷാ മരുന്നുകളും ഓക്‌സിജന്‍ സിലിണ്ടറുകള്‍ അടക്കമുള്ള ക്യാപ്‌സൂളുകളും എത്തിക്കുന്നതിന് മുന്നണി പോരാളികളായി കെ.എസ്.ആര്‍.ടി.സിഡ്രൈവര്‍മാരുടെ സേവനം ലഭ്യമാക്കുമെന്ന് സി.എം.ഡി ബിജു പ്രഭാകര്‍ അറിയിച്ചു. ഓക്‌സിജന്‍ എത്തിക്കുന്നതിന് വേണ്ടിയുള്ള ടാങ്കറുകള്‍ ഓടിക്കുന്നതിനായി കെ.എസ്.ആര്‍.ടി.സി ഡ്രൈവര്‍മാരുടെ സേവനം ഇന്ന് മുതല്‍ ലഭ്യമാക്കും. ഇതിനായി സന്നദ്ധത അറിയിച്ച ഡ്രൈവര്‍മാരുടെ ആദ്യബാച്ചിലെ 35 പേര്‍ക്ക് നാളെ പാലക്കാട് മോട്ടോര്‍വാഹന വകുപ്പ് പരിശീലനം നല്‍കും. പരിശീലനം പൂര്‍ത്തിയാക്കുന്ന ഡ്രൈവര്‍മാരുടെ സേവനം രാത്രിയോടെ ഇനോക്‌സ് കമ്പനിയുടെ ഓക്‌സിജന്‍ ടാങ്കറില്‍ ലഭ്യമാക്കും.
സംസ്ഥാനത്ത് ഓക്‌സിജന്‍ ക്ഷാമം ഉണ്ടാകാതിരിക്കാനായി പരമാവധി ഓക്‌സിജന്‍ സിലണ്ടറുകള്‍ സംസ്ഥാനത്തെ മുഴുവന്‍ ആശുപത്രിയില്‍ എത്തിക്കുന്നതിന് വേണ്ടി സംസ്ഥാന സര്‍ക്കാര്‍ ഒരുക്കിയ വാര്‍ റൂമില്‍ രാപകല്‍ കേരളത്തിലുടനീളം ഡ്രൈവര്‍മാരുടെ സേവനം ആവശ്യമുണ്ട്. ചില സമയങ്ങളില്‍ ഡ്രൈവര്‍മാരുടെ കുറവ് കാരണം വാര്‍ റൂമില്‍ നിന്നും കെ.എസ്.ആര്‍.ടി.സിയോട് സഹായം അഭ്യര്‍ത്ഥിക്കുകയായിരുന്നു. തുടര്‍ന്നാണ് സി.എം.ഡി ടാങ്കര്‍ ലോറികള്‍ സന്നദ്ധ സേവനത്തിന്റെ ഭാഗമായി സര്‍വ്വീസ് നടത്താന്‍ താല്‍പര്യമുള്ള ഡ്രൈവര്‍മാര്‍ അറിയിക്കണമെന്നുള്ള സര്‍ക്കുലര്‍ ഇറക്കിയത്.ഇതിന് പിന്നാലെ 450 തില്‍ അധികം പേരാണ് വിവിധ വിഭാഗങ്ങളില്‍ നിന്നും സന്നദ്ധ സേവനത്തിലായി താല്‍പര്യം അറിയിച്ചത്. അതില്‍ നിന്നുള്ള ആദ്യ ബാച്ചിലെ 35 ഡ്രൈവര്‍മാര്‍ക്കാണ് ഇന്ന് പരിശീലനം നല്‍കുന്നത്. തുടര്‍ന്ന് നാളെ കൊച്ചിയില്‍ നിന്നുള്ള 25 ഡ്രൈവര്‍മാരെ പരിശീലനം നല്‍കി റിസര്‍വായി വെയ്ക്കും.
ഇതിന് പുറമെ വിവിധ ജില്ലകളിലെ കളക്ടര്‍മാരുടെ ആവശ്യപ്രകാരം കെ.എസ്.ആര്‍.ടി.സിയിലെ ജീവനക്കാര്‍ പല കളക്ടറേറ്റുകളിലും ഡ്രൈവര്‍മാരായും, മറ്റ് കൊവിഡ് പ്രതിരോധ പ്രവര്‍ത്തനങ്ങളിലും സേവനം അനുഷ്ടിച്ച് വരികയുമാണ്.