കോഴിക്കോട്: കെട്ടിടനിര്‍മാണത്തിന് കുഴിയെടുക്കവേ മണ്ണിടിഞ്ഞുവീണ് രണ്ടു തൊഴിലാളികള്‍ മരിച്ചു. ആറുപേര്‍ക്ക് പരിക്കേറ്റു. ബീഹാര്‍ ബേഗുസറായി സ്വദേശികളായ കിസ്മത്ത്(30), ജബ്ബാര്‍(35) എന്നിവരാണ് മരിച്ചത്. പരിക്കേറ്റവരില്‍ മുഹമ്മദ് റഫീഖ്(30), മുഹമ്മദ് ഷഫീര്‍(26), മുഹമ്മദ് ഇക്്ബാല്‍(25) എന്നിവരെ മെഡിക്കല്‍ കോളജ് ആസ്പത്രിയില്‍ പ്രവേശിപ്പിച്ചു. ചിന്താവളപ്പ് പൂന്താനം ജംഗ്ഷന് സമീപം ഡി ആന്റ് ഡി കണ്‍സ്ട്രക്്ഷന്‍ കമ്പനിയുടെ സൈറ്റില്‍ ഇന്നലെ വൈകുന്നേരം നാലരയോടെയാണ് അപകടം. ലിഫ്റ്റ് സ്ഥാപിക്കുന്നതിനായി എടുത്ത 20 അടി താഴ്ചയുളള കുഴിയില്‍, കഴിഞ്ഞ ദിവസം ഉണ്ടായ മഴയില്‍ കുതിര്‍ന്നു നില്‍ക്കുന്ന മണ്ണ് ഇടിഞ്ഞുവീണ് തൊഴിലാളികള്‍ അകപ്പെടുകയായിരുന്നു.