കോഴിക്കോട്: നഗരത്തില്‍ കട കുത്തിത്തുറന്ന് മോഷണം നടത്തിയ കേസിലെ പ്രതിയെയും ഇയാള്‍ക്കൊപ്പം മറ്റൊരു മോഷണത്തില്‍ പങ്കാളിയായ കൂട്ടാളിയെയും പൊലീസ് പിടികൂടി. കുറ്റിയാടി സ്വദേശി അല്‍ത്താഫ്(33) അരക്കിണര്‍ സ്വദേശി ഷാനില്‍(25) എന്നിവരെയാണ് മോഷണം നടന്ന് 24 മണിക്കൂറിനുള്ളില്‍ കോഴിക്കോട് ടൗണ്‍ പോലീസ് പിടികൂടിയത്.
രണ്ടാംഗേറ്റിന് സമീപത്തെ കട കുത്തിത്തുറന്ന് ലോട്ടറി ടിക്കറ്റുകളും പണവും മോഷ്ടിച്ച കേസിലാണ് അല്‍ത്താഫിനായി പോലീസ് അന്വേഷണം ആരംഭിച്ചത്. സിസിടിവി ദൃശ്യങ്ങളില്‍ പതിയാതിരിക്കാന്‍ മുഖം മറച്ച് കൂളിങ് ഗ്ലാസ് ധരിച്ചായിരുന്നു മോഷണം. എന്നാല്‍ യുവാവിന്റെ നടത്തത്തിലെ ചില രീതികള്‍ ശ്രദ്ധിച്ച പോലീസിന് അല്‍ത്താഫാണ് മോഷണത്തിന് പിന്നിലെന്ന സംശയമുണര്‍ന്നു. തുടര്‍ന്ന് പ്രതിയെ തിരഞ്ഞ പോലീസ് സംഘം അല്‍ത്താഫിനെയും ഷാനിലിനെയും ഒരുമിച്ച് പിടികൂടുകയായിരുന്നു. ഇവരുടെ കൈയില്‍നിന്ന് രണ്ട് എയര്‍ പിസ്റ്റളുകളും കണ്ടെടുത്തു. കോട്ടപ്പറമ്പ് ആശുപത്രിക്ക് സമീപത്തെ കടയില്‍നിന്നാണ് ഇവര്‍ പിസ്റ്റളുകള്‍ മോഷ്ടിച്ചത്. ഇതിന് കസബ പോലീസ് നേരത്തെ കേസെടുത്തിരുന്നു. ഈ കേസിലെ മറ്റൊരു പ്രതിയായ അജിത്ത് വര്‍ഗീസ് ഒളിവിലാണ്.
ഡി.സി.പി. സുജിത്ത് ദാസ്, സൗത്ത് എ.സി.പി. എ.ജെ. ബാബു എന്നിവരുടെ നിര്‍ദേശമനുസരിച്ച് ടൗണ്‍ പോലീസ് ഇന്‍സ്‌പെക്ടര്‍ എ.ഉമേഷ്, എസ്.ഐ.മാരായ കെ.ടി. ബിജിത്, വി.വി. അബ്ദുല്‍ സലീം, എ.എസ്.ഐ. മുഹമ്മദ് സബീര്‍, സീനിയര്‍ സിവില്‍ പോലീസ് ഓഫീസര്‍മാരായ സജേഷ്, അനൂജ് , മുഹമ്മദ് ഷാഫി,പ്രശാന്ത് എന്നിവരാണ് പ്രതികളെ പിടികൂടിയത്.