കണ്ണൂര്‍: കോഴിക്കോട് ചേളന്നൂരില്‍നിന്ന് കാണാതായ കുട്ടികളെ പറശ്ശിനിക്കടവ് ക്ഷേത്ര പരിസരത്ത് കണ്ടെത്തി. കുമാരസ്വാമി കളംകൊള്ളിത്താഴത്തിന് സമീപത്തുനിന്ന് കാണാതായ ഞേറക്കാട്ട് മീത്തല്‍ മുഹമ്മദ് റഫീഖ് ഷെയ്ഖിന്റെ മകന്‍ മുഹമ്മദ് ഷാഹില്‍ ഷെയ്ഖ് (13), ഞേറക്കാട്ട് മീത്തല്‍ രാധാകൃഷ്ണന്റെ മകന്‍ അഭിനവ് കൃഷ്ണ (14) എന്നിവരെയാണ് കണ്ടെത്തിയത്. കഴിഞ്ഞ ചൊവ്വാഴ്ച രാവിലെ മുതലാണ് കുട്ടികളെ കാണാതായത്. ഇവരെ കോഴിക്കോട്ടെത്തിക്കാനുള്ള ശ്രമത്തിലാണ് പൊലീസ്.
കുട്ടികളെക്കുറിച്ച് ഇന്നലെ വൈകുന്നേരം പൊലീസിന് സൂചന ലഭിച്ചിരുന്നു. കുട്ടികള്‍ക്കു വേണ്ടിയുള്ള തിരച്ചില്‍ ഊര്‍ജ്ജിതമാക്കിയിരിക്കുകയായിരുന്നു പൊലീസ്. കുട്ടികളെ പറശ്ശനിക്കടവില്‍ കണ്ടതായുള്ള വിവരത്തെ തുടര്‍ന്ന് പൊലീസ് ഇവിടെ പരിശോധന നടത്തുകയായിരുന്നു. രാവിലെ പത്തുമണിയോടെയാണ് നാട്ടുകാരും പൊലീസും ചേര്‍ന്ന് ഇവരെ ക്ഷേത്രത്തിനു സമീപത്തുനിന്ന് കണ്ടെത്തിയത്. കുട്ടികള്‍ രണ്ടുപേരും അവശരാണ്. അതേസമയം, കുട്ടികള്‍ക്കൊപ്പം ഒരു മുതിര്‍ന്ന ആളുകൂടിയുണ്ടെന്നാണ് വിവരം. എന്നാല്‍ അയാളെക്കുറിച്ച് പൊലീസ് അന്വേഷിച്ചുവരികയാണ്.
രാവിലെ അഞ്ചരയോടെ മദ്രസയിലേക്കെന്നു പറഞ്ഞാണ് മുഹമ്മദ് ഷാഹില്‍ വീട്ടില്‍നിന്ന് പോയത്. എന്നാല്‍ കുട്ടി മദ്രസയില്‍ എത്തിയില്ല. ഈ സമയത്തുതന്നെയാണ് സമീപത്തെ വീട്ടിലെ അഭിനവിനെയും കാണാതാകുന്നത്. കാക്കൂര്‍ പൊലീസ് ഇവര്‍ക്കായി വ്യാപകമായ അന്വേഷണം നടത്തുന്നതിനിടെയാണ് ഇവരെ കണ്ണൂരില്‍ കണ്ടെത്തിയത്.