മുംബൈ: ഇന്ത്യന്‍ പ്രീമിയര്‍ ലീഗ് ക്രിക്കറ്റിലിന്ന് നടക്കേണ്ട ഡല്‍ഹി ക്യാപിറ്റല്‍സ്- പഞ്ചാബ് കിംഗ്‌സ് മല്‍സരം സംശയത്തില്‍. ഡല്‍ഹി ക്യാമ്പില്‍ കോവിഡ് റിപ്പോര്‍ട്ട് ചെയ്യപ്പെട്ട സാഹചര്യത്തിലാണിത്. പൂനേയില്‍ നടക്കേണ്ട മല്‍സരം മുംബൈ ബ്രാബോണ്‍ സ്‌റ്റേഡിയത്തിലേക്ക് മാറ്റിയിട്ടുണ്ട്.
കളിക്കാര്‍ റോഡ് മാര്‍ഗം ബസില്‍ യാത്ര ചെയ്യുന്നത് ആരോഗ്യകരമായി നല്ലതല്ല എന്ന റിപ്പോര്‍ട്ടിനെ തുടര്‍ന്നാണ് കളി മുംബൈയില്‍ തന്നെയാക്കിയത്. ഓസ്‌ട്രേലിയക്കാരന്‍ മിച്ചല്‍ മാര്‍ഷ് ഉള്‍പ്പെടെ അഞ്ച് ഡല്‍ഹി താരങ്ങള്‍ക്കാണ് രോഗബാധ. ഇവരെല്ലാം ക്വാറന്റൈനിലാണ്.
ഇന്ന് രാവിലെ ആര്‍.ടി.പി.സി.ആര്‍ പരിശോധന നടത്തും.രോഗബാധ കൂടുതല്‍ താരങ്ങളിലേക്ക് വ്യാപിച്ചിട്ടില്ല എന്ന് ഉറപ്പ് വരുത്തിയതിന് ശേഷമായിരിക്കും മല്‍സരം. ബയോ ബബിളില്‍ കഴിയുന്ന ക്യാമ്പില്‍ എങ്ങനെയാണ് രോഗബാധ റിപ്പോര്‍ട്ട് ചെയ്തതെന്ന് വ്യക്തമല്ല.
അവസാന സീസണില്‍ ഇതേ സംഭവങ്ങള്‍ അരങ്ങേറിയതിനെ തുടര്‍ന്ന് ചാമ്പ്യന്‍ഷിപ്പ് പാതിവിഴിയില്‍ നിര്‍ത്തിയിരുന്നു. പിന്നീട് യു.എ.ഇയിലാണ് ചാമ്പ്യന്‍ഷിപ്പിന്റെ അവസാന ഭാഗം നടന്നത്. പോയിന്റ് ടേബിളില്‍ ഡല്‍ഹി എട്ടാമതും പഞ്ചാബ് ഏഴാമതുമാണ്. അഞ്ച് മല്‍സരങ്ങള്‍ കളിച്ച റിഷാഭ് പന്തും സംഘവും രണ്ട് മല്‍സരങ്ങളില്‍ മാത്രമാണ് ഇത് വരെ ജയിച്ചത്. മായങ്ക് അഗര്‍വാള്‍ നയിക്കുന്ന പഞ്ചാബ് മൂന്ന് മല്‍സരങ്ങളില്‍ വിജയിച്ചിട്ടുണ്ട്.