കൊണ്ടോട്ടി: കൊട്ടുക്കരയില്‍ യുവതിക്ക് നേരെ പട്ടാപ്പകല്‍ ബലാത്സംഗ ശ്രമം. വീട്ടില്‍ നിന്ന് കൊട്ടുക്കര അങ്ങാടിയിലേക്ക് പോകുന്നതിനിടെ പകല്‍ ഒരു മണിയോടെയാണ് സംഭവം. കോളജ് വിദ്യാര്‍ഥിനിയായ യുവതിയെ വയലിലേക്ക് വലിച്ചുകൊണ്ടുപോയി കല്ലുകൊണ്ട് തലക്കടിച്ചു കീഴ്‌പ്പെടുത്തി. ഗുരുതര പരിക്കേറ്റ പെണ്‍കുട്ടിയെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
പെണ്‍കുട്ടി കൊട്ടുക്കര അങ്ങാടിയിലേക്ക് വരുന്നതിനിടെ വഴിയില്‍ ആളൊഴിഞ്ഞ സ്ഥലത്ത് കാത്തു നില്‍കക്കുകയായിരുന്നു അക്രമി. തുടര്‍ന്ന് പെണ്‍കുട്ടിയെ കീഴ്‌പ്പെടുത്തി സമീപത്തെ വാഴത്തോട്ടത്തിലേക്ക് വലിച്ചിഴച്ചു കൊണ്ടുപോയി. കുതറി രക്ഷപ്പെടാന്‍ ശ്രമിച്ച പെണ്‍കുട്ടിയെ അക്രമി കല്ലുകൊണ്ട് തലക്കിടിച്ചു വീഴ്ത്തി. ഇതോടെ പെണ്‍കുട്ടി തൊട്ടടുത്ത വീട്ടിലേക്ക് ഓടിച്ചെന്ന് അഭയം തേടുകയായിരുന്നു.
പ്രതിയെ ഇതുവരെ കണ്ടെത്താനായിട്ടില്ല. സിസിടിവി പരിശോധനകള്‍ നടത്തുന്നുണ്ട്. പ്രതിയുടേതെന്ന് സംശയിക്കുന്ന ചെരിപ്പ് സംഭവം നടന്ന സ്ഥലത്തുനിന്ന് കിട്ടിയിട്ടുണ്ട്. മലപ്പുറത്തുനിന്ന് ഡോഗ് സ്‌ക്വാഡും വിരലടയാള വിദഗ്ധരും സ്ഥലത്തെത്തി തെളിവുകള്‍ ശേഖരിച്ചു. പൊലീസ് നായ കൊട്ടുക്കര ബസ് സ്റ്റോപ്പു വരെ മണംപിടിച്ചെത്തി. ഇതോടെ പ്രതി ബസില്‍ കയറി രക്ഷപ്പെട്ടെന്ന് കരുതുന്നു. കൊണ്ടോട്ടി ഇന്‍സ്‌പെക്ടര്‍ എംസി പ്രമോദാണ് കേസന്വേഷിക്കുന്നത്.