കോഴിക്കോട്: കേരള രാഷ്ട്രീയത്തിലെ സമുന്നതരായ നേതാക്കളില്‍പ്പെട്ട കോടിയേരി ബാലകൃഷ്ണന്റെ നിര്യാണം അദ്ദേഹത്തിന്റെ പാര്‍ട്ടിയിലും കേരളീയ പൊതുസമൂഹത്തിലും വിടവ് സൃഷ്ടിക്കുന്നതാണെന്ന് മുസ്‌ലിംലീഗ് ദേശീയ സീനിയര്‍ വൈസ് പ്രസിഡന്റ് ഡോ.എം.പി. അബ്ദുസ്സമദ് സമദാനി എം.പി.
ജീവിതത്തിന്റെ അന്ത്യംവരെ തന്റെ രാഷ്ട്രീയ നിലപാടുകള്‍ക്ക് വേണ്ടി ഉറച്ചുനിന്ന അദ്ദേഹം കലശലായ രോഗം ബാധിച്ച് ആശുപത്രിയില്‍ പ്രവേശിപ്പിക്കപ്പെടുന്നത് വരെയും പൊതുരംഗത്ത് സജീവമായ സാന്നിദ്ധ്യം പുലര്‍ത്തി. രാഷ്ട്രീയ അഭിപ്രായവ്യത്യാസങ്ങള്‍ക്കതീതമായി മറ്റുള്ളവരുമായി വിശാലമായ സൗഹൃദം പുലര്‍ത്താന്‍ പ്രത്യേക താല്‍പര്യം പ്രകടിപ്പിച്ച രാഷ്ട്രീയ നേതാവായിരുന്നു അദ്ദേഹം. കഠിനമായ രോഗത്തിനിടയിലും സൗഹൃദങ്ങളെ അദ്ദേഹം പുലര്‍ത്തുകയും മാനിക്കുകയും ചെയ്തു.ചെന്നൈയില്‍ മുസ്്‌ലിംലീഗ് ദേശീയ എക്‌സിക്യൂട്ടീവ് യോഗത്തിന് പോയപ്പോള്‍ അദ്ദേഹത്തെ സന്ദര്‍ശിച്ചതും കലശലായ രോഗാവസ്ഥക്കിടയിലും അദ്ദേഹം നിറഞ്ഞ സൗഹൃദത്തോടെ ദീര്‍ഘസമയം സംഭാഷണം നടത്തിയതും ഓര്‍ത്തുപോകുന്നുവെന്ന് സമദാനി കൂട്ടിച്ചേര്‍ത്തു.