തൃത്താല എം എല്‍ എ വി.ടി ബലറാമിന്റെ ഫെയ്‌സ്ബുക്ക് പോസ്റ്റിനെ തുടര്‍ന്നുണ്ടായ വിവാദത്തില്‍ കെ.എം ഷാജി എം എല്‍ എ യുടെ പ്രതികരണം സാമൂഹ്യമാധ്യമങ്ങളില്‍ വൈറലാകുന്നു. ആവിഷ്‌കാര സ്വാതന്ത്രത്തിന് വേണ്ടി മുറവിളി കൂട്ടാറുള്ള ഇടതുപക്ഷം അവരുടെ നേതാക്കന്മാരെ വിമര്‍ശനാതീതരായി കാണുന്നതിലെ ഇരട്ടത്താപ്പ് ഇതിനകം തന്നെ സോഷ്യല്‍ മീഡിയയില്‍ ചര്‍ച്ചയായി കഴിഞ്ഞിരുന്നു.
പോസ്റ്റിന്റെ പൂര്‍ണ്ണ രൂപം വായിക്കാം
ആവിഷ്‌കാര സ്വാതന്ത്ര്യത്തിന്റെ അതിര്‍ത്തി എവിടെയെന്ന ചോദ്യത്തിനുള്ള ഉത്തരമാണ് ഇപ്പോള്‍ കിട്ടിയിരിക്കുന്നത്. സഖാക്കളുടെ ആക്ഷേപവും, മോര്‍ഫിങ്ങും, മതനിന്ദയും, വ്യാജ ആരോപണങ്ങളും ആവിഷ്‌കാരത്തിന്റെ പരിധിയിലാണ് വരുന്നത്. മത വിശ്വാസത്തെയും, സാംസ്‌കാരിക ചിഹ്നങ്ങളെയും അവഹേളിക്കുന്നത് ആവിഷ്‌കാരസ്വാതന്ത്ര്യമാണ്. എന്നാല്‍ എ കെ ജിയെ വിമ്മര്‍ശിക്കരുത്.
മുഖ്യമന്ത്രിയെ കല്ലെറിഞ്ഞതും, മന്‍മോഹനെ ആക്ഷേപിച്ചതും ആവിഷ്‌കാരമാണ്. എന്നാല്‍ എ കെ ജിയെ തൊട്ടു കളിക്കരുത്. ആത്മകഥ പോലും വിമര്‍ശനാത്മകമായി വായിക്കരുത്. വായിച്ചാല്‍ ഓഫിസ് തല്ലിത്തകര്‍ക്കും, കിട്ടിയാല്‍ കൈകാര്യം ചെയ്യും.
ഏ കെ ജിയെ വിലയിരുത്തേണ്ടത് അദ്ദേഹത്തിന്റെ ത്യാഗോ ജ്വല രാഷ്ട്രീയ ജീവിതത്തിന്റെ അടിസ്ഥാനത്തിലാണ്. അദ്ദേഹത്തിന്റെ പ്രണയത്തിന്റെയോ, വിവാഹ മോചനത്തിന്റെയോ അടിസ്ഥാനത്തിലല്ല. പരിദേവനം കൊള്ളാം.പക്ഷെ,കഴിഞ്ഞ പത്ത് വര്‍ഷത്തിനിടയില്‍ ഈയൊരു തിരിച്ചറിവ് മാധ്യമസാംസ്‌കാരിക രാഷ്ട്രീയ രംഗത്ത് പ്രവര്‍ത്തിക്കുന്ന ഒരു ഇടതു പക്ഷക്കാരനും ഉണ്ടായിരുന്നില്ല. ഉണ്ടായിരുന്നെങ്കില്‍ കേരള രാഷ്ട്രീയം ഇവ്വിധം വ്യാജ ആരോപണങ്ങളാല്‍ മലിനമാകുമായിരുന്നില്ല.
കാലങ്ങളായി സ്വന്തം പുരയിടത്തിലെ മാലിന്യം അയല്‍പക്കത്തെ വീട്ടിലേക്കിടുന്ന പണിയായിരുന്നു ഇടതുപക്ഷം നിര്‍വഹിച്ചത്. അത് കോരിയെടുത്ത് ഒരു പയ്യന്‍ ‘ ഇതാ നിങ്ങളുടെ മാലിന്യം ‘ എന്നു പറഞ്ഞ് മാന്യതയില്ലാത്ത അയല്‍ക്കാരന്റെ വീട്ടിലേക്ക് തിരിച്ച് നിക്ഷേപിച്ചിരിക്കുന്നു. അത് കണ്ട അയല്‍ക്കാരന് ശുണ്ഠി പിടിച്ചിരിക്കുന്നു. അയല്‍ക്കാരാ, ശുണ്ഠി പിടിക്കേണ്ട. അയാള്‍ നിനക്ക് തിരിച്ചറിവ് നല്‍കിയിരിക്കുകയാണ്.
ആവിഷ്‌കാരം ഞങ്ങളുടെ മാത്രം പ്രിവിലേജാണ്. നിങ്ങളുടേതല്ല. വി.ടി ബല്‍റാം ടി.പി ചന്ദ്രശേഖരന്‍ ആകാതിരിക്കുന്നത് ഇടതുപക്ഷത്തിന്റെ സഹിഷ്ണുത കൊണ്ടാണ്. ആവിഷ്‌കാരത്തിന്റെ രീതി 51 വെട്ടാണ്.