ചെറു എംപിവി വിപണിയിലേക്ക് പുതിയ വാഹനവുമായി കിയ. ചെറു എസ്‌യുവിയായ സോണറ്റിന്റെ 7 സീറ്റ് വകഭേദത്തിന്റെ ആദ്യ പ്രദര്‍ശനം ഏപ്രില്‍ 8ന് നടത്തും. ഇന്തോനീഷ്യന്‍ വിപണിയിലായിരിക്കും പുതിയ വാഹനം ആദ്യം പുറത്തിറങ്ങുക. ആന്ധ്രാപ്രദേശിലെ അനന്തപൂര്‍ ശാലയില്‍ നിര്‍മിക്കുന്ന വാഹനം ഇന്ത്യയില്‍ കിയ പുറത്തിറക്കുമോ എന്ന് വ്യക്തമാക്കിയിട്ടില്ല.
ഇന്തോനീഷ്യന്‍ വിപണിക്കായുള്ള സോണറ്റും അനന്തപൂര്‍ ശാലയില്‍ തന്നെയാണ് നിര്‍മിക്കുന്നത്. ഇന്ത്യന്‍ പതിപ്പില്‍ നിന്ന് വ്യത്യസ്തമായി നീളം കൂടുതലുണ്ട് ഇന്തോനീഷ്യന്‍ മോഡലിന്.
വലുപ്പം കൂട്ടാതെ മൂന്നുനിര സീറ്റുകളുമായിട്ടായിരിക്കും പുതിയ സോണറ്റ് 7 സീറ്റ് മോഡല്‍ എത്തുക. 1.5 ലീറ്റര്‍ പെട്രോള്‍ എന്‍ജിനോടെ എത്തുന്ന വാഹനത്തിന് ആറു സ്പീഡ് മാനുവല്‍ ഗിയര്‍ബോക്‌സും സിവിടി ഓട്ടമാറ്റിക് ഗിയര്‍ബോക്‌സുമുണ്ടാകും. ഇന്തോനീഷ്യന്‍ വിപണിയില്‍ ടൊയോട്ട അവാന്‍സ, ദൈഹാറ്റ്‌സു സീനിയ തുടങ്ങിയ വാഹനങ്ങളുമായിട്ടാണ് സോണറ്റ് 7 സീറ്റര്‍ മത്സരിക്കുക.