കേരളീയം 2023 പരിപാടി ബഹിഷ്‌കരിച്ച് പ്രതിപക്ഷം. സാമ്പത്തിക പ്രതിസന്ധിക്കിടെയുള്ള ‘കേരളീയം’ ധൂര്‍ത്താണെന്ന് ആരോപിച്ചാണ് പ്രതിപക്ഷം ചടങ്ങ് ബഹിഷ്‌കരിച്ചത്. കേരളീയത്തിന്റെയും നവ കേരള സദസ്സിന്റെയും പേരില്‍ പണം പിരിച്ച് വമ്പന്‍ അഴിമതി അരങ്ങേറുകയാണെന്ന് യു.ഡി.എഫ് ആരോപിച്ചു.കേരളീയം 2023ഉം നവ കേരള സദസും സര്‍ക്കാരിന്റെ തെരഞ്ഞെടുപ്പ് പ്രചരണ പരിപാടികളാണെന്ന വിലയിരുത്തലിലാണ് യുഡിഎഫ്.
വിറ്റ നെല്ലിന്റെ പണം കിട്ടാത്ത കര്‍ഷകര്‍, ചെയ്ത ജോലിയുടെ ശമ്പളം കിട്ടാത്ത കെ.എസ്.ആര്‍.ടി.സി ജീവനക്കാര്‍, ഉച്ചക്കഞ്ഞി പ്രതിസന്ധി, പെന്‍ഷന്‍ കുടിശ്ശിക ഇതിനൊന്നും പണം നല്‍കാതെ 27 കോടി ചെലവാക്കി കേരളീയം നടത്തുന്നത് ദൂര്‍ത്ത് അല്ലാതെ മറ്റെന്താണ് എന്നും പ്രതിപക്ഷം ചോദിച്ചു. പരിപാടിയിലേക്ക് പ്രതിപക്ഷ നേതാവ് വി.ഡി സതീശന്‍ അടക്കമുള്ള പ്രതിപക്ഷ ജനപ്രതിനിധികള്‍ക്ക് ക്ഷണമുണ്ടായിരുന്നെങ്കിലും ആദ്യമേ നിരസിച്ചിരുന്നു.