മലപ്പുറം: സന്തോഷ് ട്രോഫി സെമിയില്‍ മിന്നും പ്രകടനം നടത്തിയ ജെസിനെ ടീമിലെത്തിക്കാന്‍ കേരള ബ്ലാസ്‌റ്റേഴ്‌സ്. പയ്യനാട് ഫുട്‌ബോള്‍ സ്‌റ്റേഡിയത്തില്‍ നടന്ന മത്സരത്തില്‍ പകരക്കാരനായി വന്ന് അഞ്ച് തവണ കര്‍ണാടകയുടെ വലകുലുക്കിയ പ്രകടനത്തോടെ താരമായ ജെസിനെ ടീമിലെത്തിക്കുന്നതിന് കേരള ബ്ലാസ്‌റ്റേഴ്‌സ് മാനേജ്‌മെന്റ് ഇതിനകം ശ്രമം ആരംഭിച്ചിട്ടുണ്ട്.
ടൂര്‍ണമെന്റിലുടനീളം മികച്ച പ്രകടനവുമായി നിലവില്‍ ടോപ് സ്‌കോററാണ് മലപ്പുറം നിലമ്പുര്‍ സ്വദേശിയായ ജെസിന്‍. മലപ്പുറത്ത് നിന്നുള്ള ഒരാളെ ടീമില്‍ എത്തിക്കുക എന്നത് കൂടിയാണ് ബ്ലാസ്‌റ്റേഴ്‌സ് ലക്ഷ്യം വെക്കുന്നത്. എന്നാല്‍ നിലവില്‍ കേരള യുണൈറ്റഡ് എഫ്.സി താരമായ ജെസിനെ വിട്ടുനല്‍കുന്നതിന് റിലീസ് ക്ലോസ് ആയി 25 ലക്ഷം രൂപ വേണമെന്ന് കേരള യുണൈറ്റഡ് എഫ്.സി ആവശ്യം അറിയിച്ചതോടെ തീരുമാനം അനിശ്ചിതത്വത്തിലാണ്. എങ്കിലും ചര്‍ച്ചകള്‍ അവസാനിച്ചിട്ടില്ല.