മലപ്പുറം: കേരളം കണ്ട ഏറ്റവും വലിയ പ്രകൃതി ദുരന്തത്തിന്റെ ഓര്‍മകള്‍ക്ക് 15 മാസം പൂര്‍ത്തിയായി. കണ്ണീരുണങ്ങാത്ത കവളപ്പാറയിലും പാതാറിലും കാരണ്യത്തിന്റെ സാന്ത്വന സ്പര്‍ഷമേകി മുസ്്‌ലിംലീഗ് മലപ്പുറം ജില്ലാ കമ്മിറ്റി പ്രഖ്യാപിച്ച പദ്ധതികളോരോന്നും അതിന്റെ പൂര്‍ത്തീകരണഘട്ടത്തിലാണ്. അപകടത്തില്‍ വീടും സ്ഥലവുംനഷ്ടമായ 50 കുടുംബങ്ങള്‍ക്ക് തലചായ്ക്കാനിടം നല്‍കുമെന്ന പാര്‍ട്ടിയുടെ പ്രഖ്യാപനം ഇന്നലെ യാഥാര്‍ത്ഥ്യമായി.
പുനഃരധിവാസ പ്രവര്‍ത്തനങ്ങളില്‍ സര്‍ക്കാര്‍ പരാചയപ്പെട്ടിടത്താണ് മുസ്്‌ലിം ലീഗ് ഒരു രാഷ്ട്രീയ പാര്‍ട്ടി എന്ന നിലയില്‍ അതിന്റെ ധാര്‍മിക ഉത്തരവാദിത്ത മേറ്റെടുത്തത്. അമ്പത് കുടുംബങ്ങള്‍ക്ക് വീടുവെക്കാന്‍ സ്ഥലമെന്ന പ്രഖ്യാപനം വന്നഘട്ടത്തില്‍ പലരും നെറ്റിചുളിച്ചിരുന്നുവെങ്കിലും കരുണ വറ്റാത്ത മനസുകളുടെ സഹകരണത്തോടെ അത് യാഥാര്‍ത്ഥ്യമാക്കിയ ചാരിതാര്‍ത്ഥ്യത്തിലാണ് മുസ്ലിം ലീഗ് മലപ്പുറം ജില്ലാ കമ്മിറ്റി. അമ്പത് കുടുംബങ്ങള്‍ക്കായി മൂന്ന് ഏക്കര്‍ ഭൂമിയാണ് മുസ്്‌ലിം ലീഗ് ജില്ലാ കമ്മിറ്റി ഏറ്റെടുത്തത്. ഇതില്‍ 30 സെന്റ് ആക്കപ്പറമ്പന്‍ സാദിഖലിയും 40 സെന്റ് കപ്പച്ചാലി ഷാജിയും മുസ്‌ലിംലീഗിനെ ഏല്‍പിച്ചു. ബാക്കിയുള്ളത് ജില്ലാ കമ്മിറ്റി പണം നല്‍കിവാങ്ങി.
പ്രസിഡന്റ് സയ്യിദ് സാദിഖലി തങ്ങളുടെ നിര്‍ദേശ പ്രകാരം നറുക്കെടുത്ത് ഉപഭോക്താക്കള്‍ ക്ക് സ്ഥലം നിര്‍ണയിക്കാന്‍ തീരുമാനിക്കുകയായിരുന്നു. ഇന്നലെ പോത്തുകല്ല് ഞെട്ടിക്കുളത്ത് നടന്ന നറുക്കെടുപ്പില്‍ കവളപ്പാറ, പാതാറ്, അമ്പുട്ടാന്‍പെട്ടി, പോത്തുകല്ല്, മേഖലയില്‍ പ്രളയത്തില്‍ വീടുനഷ്ടപ്പെട്ട മുഴുവന്‍ കുടുംബങ്ങള്‍ക്കും സാദിഖലി തങ്ങളുടെ കരങ്ങളാല്‍ നറുക്കെടുത്ത് സ്ഥലം നിര്‍ണയിച്ചു നല്‍കി.
സംസ്ഥാനം കണ്ട ഏറ്റവും വലിയ ദുരന്തം നടന്നിട്ടും സര്‍ക്കാറിന്റെ ഭാഗത്ത് നിന്നും കാര്യമായ പദ്ധതികള്‍ ഇനിയും പ്രഖ്യാപിക്കാത്ത ദേശമാണ് കവളപ്പാറ. സര്‍ക്കാറിന്റെ ഈ അവഗണനക്കെതിരെയാണ് മുസ്്‌ലിംലീഗ് ഈ വെല്ലുവിളി ഏറ്റെടുത്തത്. 2019 ആഗസ്റ്റ് എട്ടിന് അപകട സമയത്ത് സര്‍ക്കാര്‍ സംവിധാനങ്ങള്‍ പരാചയപ്പെട്ട ഘട്ടത്തിലും മുസ്ലിം ലീഗ് നടത്തിയ രക്ഷാ പ്രവര്‍ത്തനങ്ങള്‍ ദേശീയ മാധ്യമങ്ങള്‍ വരെ പ്രശംസിച്ചിരുന്നു. അതിന് ശേഷം ദുരിതാശ്വാസ കാമ്പുകളില്‍ ഭക്ഷണമെത്തിച്ചും അവിടെ നിന്നും ഭവനങ്ങലേക്ക് മടങ്ങിയവര്‍ക്ക് വീടു വൃത്തിയാക്കുന്നതിന് നേതൃത്വം നല്‍കിയും പാര്‍ട്ടിയും പോഷക ഘടകങ്ങളും കടമ നിറവേറ്റി. സര്‍ക്കാറിന്റെ ഭാഗം പരാചയമാണെന്ന് തിരിച്ചറഞ്ഞ് കവളപ്പാറയുടെയും പാതാറിന്റെയും പുനഃര്‍നിര്‍മ്മാണത്തിന് വേണ്ടി കവളപ്പാറയില്‍ നിന്നും ജില്ലാ ആസ്ഥാനമായ മലപ്പുറം കലക്ട്രേറ്റിലേക്ക് സമരയാത്ര സംഘടിപ്പിച്ചത് പാര്‍ട്ടിയുടെ സമര ചരിത്രത്തിലെ വലിയഏടായിമാറിയിരുന്നു.
സ്ഥലം നിര്‍ണയ നറുക്കെടുപ്പിന് ജില്ലാപ്രസിഡന്റ് പാണക്കാട് സയ്യിദ് സാദിഖലി തങ്ങള്‍ നേതൃത്വം നല്‍കി. ചടങ്ങില്‍ മുസ്ലിം ലീഗ് ജില്ലാ സെക്രട്ടറി ഇസ്മാഈല്‍ പി മൂത്തേടം അദ്ധ്യക്ഷത വഹിച്ചു.ടി.വി.ഇബ്രാഹിം എം.എല്‍.എ, ജില്ലാ സെക്രട്ടറി പി.കെ.സി അബ്ദുറഹിമാന്‍, യൂത്ത് ലീഗ് ജില്ലാ പ്രസിഡണ്ട് അന്‍വര്‍ മുള്ളമ്പാറ, അഡ്വ. എന്‍.എ കരീം, കബീര്‍ മുതുപറമ്പ്, കെ.എം ഇസ്്മാഈല്‍, കെ.ടി കുഞ്ഞാന്‍, സി.എച്ച് ഇഖ്ബാല്‍, കൊമ്പന്‍ ഷംസുദ്ദീന്‍, ഇ. പോക്കര്‍, ആലായി അലവിക്കുട്ടി, ഉബൈദ് കാച്ചീരി, സുലൈമാന്‍ ഹാജി, ആക്കപ്പറമ്പന്‍ സാദിഖലി, സി.എച്ച് കരീം പങ്കുടുത്തു.