ന്യൂഡല്‍ഹി: അംഗത്വമെടുത്ത് മണിക്കൂറുകള്‍ക്കുള്ളില്‍ കപില്‍ ഗുജ്ജാറിനെ ബിജെപിയില്‍ നിന്ന് പുറത്താക്കി. ഡല്‍ഹിയില്‍ പൗരത്വ പ്രതിഷേധം നടക്കുന്നതിനിടെ പ്രതിഷേധക്കാര്‍ക്ക് നടുവിലേക്ക് വെടിയുതിര്‍ത്ത കപില്‍ ഗുജ്ജാര്‍ കഴിഞ്ഞ ബുധനാഴ്ചയായിരുന്നു ബിജെപിയില്‍ ചേര്‍ന്നത്.
ഉത്തര്‍ പ്രദേശിലെ ഗാസിയാബാദില്‍ നിന്നാണ് ബിജെപിയില്‍ അംഗത്വമെടുത്തിരുന്നത്. പാര്‍ട്ടി ഹിന്ദുത്വക്ക് വേണ്ടിയാണ് പ്രവര്‍ത്തിക്കുന്നത് എന്നത് കൊണ്ടാണ് ബിജെപിയില്‍ ചേര്‍ന്നതെന്ന് അംഗത്വമെടുത്തതിന് ശേഷം ഗുജ്ജാര്‍ പറഞ്ഞിരുന്നു.
ഫെബ്രുവരി 1നാണ് പൗരത്വ നിയമ ഭേദഗതിക്കെതിരെ ഡല്‍ഹിയില്‍ പ്രതിഷേധിച്ച് കൊണ്ടിരുന്ന പ്രതിഷേധക്കാര്‍ക്ക് നേരെ ഗുജ്ജാര്‍ വെടിയുതിര്‍ത്തത്. ജയ്ശ്രീറാം വിളിച്ചുകൊണ്ടും ഈ രാജ്യത്ത് ഹിന്ദുക്കള്‍ മാത്രം മതി, മറ്റാരും വേണ്ട എന്ന് ആക്രോശിച്ചും കൊണ്ടായിരുന്നു പ്രതിഷേധക്കാര്‍ക്ക് നേരെ ഇയാള്‍ വെടിയുതിര്‍ത്തത്.