കുവൈത്ത് തീപിടിത്തത്തില്‍ മരിച്ച മലയാളികളുടെ എണ്ണം 13 ആയി. മലപ്പുറം തിരൂര്‍ സ്വദേശിയും കണ്ണൂര്‍ ധര്‍മടം സ്വദേശിയുമായാണ് മരിച്ചതായി ബന്ധുക്കള്‍ക്ക് വിവരം ലഭിച്ചത്. തിരൂര്‍ കൂട്ടായി കോതപറമ്പ് സ്വദേശി കുപ്പന്റെപുരയ്ക്കല്‍ നൂഹ് (40) ആണ് മരിച്ചത്. രണ്ടുമാസം മുമ്പാണ് നൂഹ് അവധി കഴിഞ്ഞ് കുവൈത്തിലേക്ക് മടങ്ങിയത്.
കണ്ണൂര്‍ ധര്‍മടം സ്വദേശി ബിശ്വാസ് കൃഷ്ണന്‍ (33) ആണ് മരിച്ചത്. ഇന്ന് രാവിലെയാണ് ബിശ്വാസിന്റെ മരണം സ്ഥിരീകരിച്ചത്. ഒരു വര്‍ഷം മുമ്പാണ് ബിശ്വാസ് കുവൈത്തിലെ കമ്പനിയില്‍ ജോലിയില്‍ പ്രവേശിച്ചത്.
പത്തനംതിട്ട ജില്ലക്കാരനായ ഒരാള്‍ കൂടി തീപിടിത്തത്തില്‍ മരിച്ചു. തിരുവല്ല പെരിങ്ങര പഞ്ചായത്ത് മൂന്നാം വാര്‍ഡില്‍ മേപ്രാല്‍ മരോട്ടിമൂട്ടില്‍ ചിറയില്‍ വീട്ടില്‍ തോമസ് സി ഉമ്മന്‍ ആണ് മരിച്ചതായി ഇന്ന് രാവിലെ ബന്ധുക്കള്‍ക്ക് വിവരം ലഭിച്ചത്. 4 വര്‍ഷം മുമ്പാണ് ഇയാള്‍ ജോലിക്കായി കുവൈത്തിലെത്തിയത്. ആകാശ് എസ്. നായര്‍, പി.വി മുരളീധരന്‍ നായര്‍, സജു വര്‍ഗീസ് എന്നീ പത്തനംതിട്ട സ്വദേശികള്‍ മരിച്ചതായി ഇന്നലെ തന്നെ സ്ഥിരീകരിച്ചിരുന്നു.