മുംബൈ: ബോളിവുഡില്‍ വമ്പന്‍ ഗ്യാങ് തന്നെ പ്രവര്‍ത്തിക്കുന്നുണ്ട് എന്നും ആമിര്‍ ഖാന്‍ അടക്കമുള്ള അഭിനേതാക്കള്‍ ഇതിന്റെ ഭാഗമാണെന്നും നടി കങ്കണ റണാവട്ട്. സുശാന്ത് സിങ് രജ്പുതിന്റെ മരണത്തില്‍ സി.ബി.ഐ അന്വേഷണം ഈ ഗ്യാങ് സി.ബി.ഐ അന്വേഷണം ആവശ്യപ്പെടില്ലെന്നും അവര്‍ പറഞ്ഞു. റിപ്പബ്ലിക് ടിവിക്ക് നല്‍കിയ അഭിമുഖത്തില്‍ സംസാരിക്കുകയായിരുന്നു അവര്‍.
‘ഈ റാക്കറ്റ് എങ്ങനെ പ്രവര്‍ത്തിക്കുന്നു എന്ന് നിങ്ങള്‍ക്കറിയാമോ? ഒരാള്‍ ഒന്നും പറഞ്ഞില്ലെങ്കില്‍ ആ റാക്കറ്റ് മുഴുവനും ഒന്നും പറയില്ല. സുശാന്തിന്റെ മരണത്തില്‍ ഒരാളും സി.ബി.ഐ അന്വേഷണം ആവശ്യപ്പെട്ടില്ല. നോക്കൂ ആമിര്‍ഖാന്‍ സുശാന്തിനൊപ്പം പികെയില്‍ അഭിനയിച്ചിട്ടുണ്ട്. അദ്ദേഹം ഒന്നും പറഞ്ഞില്ലെങ്കില്‍ അനുഷ്‌ക ശര്‍മ ഒന്നും പറയില്ല. രാജു ഹിറാനി ഒന്നും പറയില്ല. ആദിത്യ ചോപ്രയും ഭാര്യ റാണി മുഖര്‍ജിയും ഒന്നും പറയില്ല. ഈ റാക്കറ്റ് ഒരു ഗ്യാങ് പോലെയാണ് ഉള്ളത്’ – അവര്‍ പറഞ്ഞു.
ബോളിവുഡിലെ സുപ്രധാന അംഗമായിരുന്നിട്ടു പോലും ഒരു കൊതുകോ ഈച്ചയോ മരിച്ച പോലെയാണ് സുശാന്തിന്റെ വാര്‍ത്ത ആളുകള്‍ കൈകാര്യം ചെയ്തത്. ഇപ്പോഴും ചിലര്‍ മാത്രമാണ് സംസാരിക്കുന്നത്. ചിലര്‍ മിണ്ടാതിരിക്കുന്നു. അദ്ദേഹത്തിന്റെ പിതാവും കുടുംബവും കരയുകയാണ്. നിങ്ങള്‍ എന്താണ് ഭയപ്പെടുന്നത്- അവര്‍ ചോദിച്ചു.
ബുധനാഴ്ചയാണ് സുശാന്തിന്റെ ആത്മഹത്യയില്‍ സുപ്രിം കോടതി സി.ബി.ഐ അന്വേഷണത്തിന് അനുമതി നല്‍കിയത്. അന്വേഷണത്തെ കുടുംബവും ഒരുവിഭാഗം ചലചിത്ര പ്രവര്‍ത്തകരും സ്വാഗതം ചെയ്തു.