സിപിഐ സംസ്ഥാന സെക്രട്ടറി കാനം രാജേന്ദ്രന്‍റെ വലതു കാൽപാദം മുറിച്ചുമാറ്റി. പ്രമേഹ രോഗവും അണുബാധയും മൂലമാണ് കാനത്തിന്‍റെ കാൽപാദം മുറിച്ചുമാറ്റിയത്. അനാരോഗ്യം മൂലം പാർട്ടിയ്ക്ക് മൂന്നു മാസത്തെ അവധി അപേക്ഷ നൽകിയിരിക്കുകയാണ് അദ്ദേഹം. നിലവിൽ കൊച്ചിയിലെ സ്വകാര്യ ആശുപത്രിയിൽ കാനം ചികിത്സയിൽ കഴിയുകയാണ്.
വലതു കാലിന്‍റെ അടിഭാഗത്തുണ്ടായ മുറിവ് പ്രമേഹം കാരണം കരിയാതെ വന്നതോടെയാണ് കാനം രാജേന്ദ്രന് കാൽപാദം മുറിച്ചുമാറ്റേണ്ടി വന്നത്. ആദ്യം ഓപ്പറേഷൻ ചെയ്ത് മൂന്നുവിരലുകൾ മുറിച്ചെങ്കിലും അണുബാധ കുറയാതെ വന്നതോടെയാണ് കാൽപാദം മുറിക്കുന്നത്. കഴിഞ്ഞ ചൊവ്വാഴ്ചയാണ് പാദം മുറിച്ചു മാറ്റിയതെന്നാണ് കാനം വ്യക്തമാക്കിയത്.