കാബൂള്‍: കാബൂള്‍ വിമാനതാവളത്തിലെ എല്ലാ സര്‍വീസുകളും നിര്‍ത്തിവച്ചു. ഇതോടെ അറുപതോളം രാജ്യങ്ങളിലെ പൗരന്മാര്‍ കാബൂളില്‍ കുടുങ്ങി. അഫ്ഗാന്‍ വ്യോമപാതയിലൂടെയുള്ള എല്ലാ അന്താരാഷ്ട്ര വിമാന സര്‍വീസുകളും നേരത്തെ തന്നെ നിര്‍ത്തിവച്ചിരുന്നു.
അതേസമയം കാബൂള്‍ കൂടി താലിബാന്‍ പിടിച്ചടക്കിയതിനെ തുടര്‍ന്ന് സമാനതകളില്ലാത്ത കൂട്ടപ്പലായനമായിരുന്നു കാബൂള്‍ വിമാന താവളത്തില്‍ കണ്ടത്. പതിനായിരക്കണക്കിന് പേര്‍ വിമാനതാവളം ലക്ഷ്യമാക്കി വന്നതോടെ നിയന്ത്രണം അമേരിക്കക്ക് ഏറ്റെടുക്കേണ്ടി വന്നു. ജനക്കൂട്ടം പിരിച്ചുവിടാന്‍ സുരക്ഷാ ഭടന്മാര്‍ നടത്തിയ വെടിവപ്പില്‍ രണ്ടു പേര്‍ മരിച്ചതായാണ് സൂചന.
അതിനിടെ മുന്‍ പ്രസിഡന്റ് അഷ്‌റഫ് ഗനി രാജ്യം വിട്ട് താജികിസ്താനിലേക്ക് പോയെങ്കിലും പ്രവേശനം നിഷേധിച്ചു. ഇതോടെ അദ്ദേഹം ഒമാനിലെത്തിയെന്നാണ് റിപ്പോര്‍ട്ടുകള്‍.