തൃശൂര്‍: കൊടകര കുഴല്‍പണക്കേസില്‍ ബിജെപി സംസ്ഥാന അധ്യക്ഷന്‍ കെ.സുരേന്ദ്രന്റെ മകനിലേക്കും അന്വേഷണം. ധര്‍മരാജനും സുരേന്ദ്രന്റെ മകനും പലതവണ ഫോണില്‍ ബന്ധപ്പെട്ടുവെന്നാണ് പൊലീസ് കണ്ടെത്തല്‍. തെരഞ്ഞെടുപ്പ് സമയത്ത് ഇരുവരും കോന്നിയില്‍ വച്ച് കൂടിക്കാഴ്ച നടത്തിയതായാണ് വിവരം. ഇക്കാര്യത്തില്‍ സുരേന്ദ്രന്റെ മകന്റെയും മൊഴിയെടുക്കും.
അതേസമയം, മൂന്നരക്കോടി രൂപയുടെ കുഴല്‍പണ കേസില്‍ ബിജെപി സംസ്ഥാന പ്രസിഡന്റ് കെ.സുരേന്ദ്രന്റെ സെക്രട്ടറി ദിപിന്‍, ഡ്രൈവര്‍ ലബീഷ് എന്നിവരെ ചോദ്യം ചെയ്തിരുന്നു. ഇതോടെ അന്വേഷണം സുരേന്ദ്രനിലേക്ക് എത്തുമെന്ന സാഹചര്യമായിരുന്നു. ഇവര്‍ 2 പേരും കുഴല്‍പണ ഇടപാടു നടന്നെന്നു പറയുന്ന ദിവസങ്ങളില്‍ പണം കൈകാര്യം ചെയ്ത ധര്‍മരാജനുമായി പലതവണ ബന്ധപ്പെട്ടിരുന്നെന്നു കണ്ടെത്തി.
അതിനിടെ, തൃശൂര്‍ മണ്ഡലത്തിലെ എന്‍ഡിഎ സ്ഥാനാര്‍ഥിയായിരുന്ന സുരേഷ് ഗോപി എംപിയില്‍നിന്നു പൊലീസ് മൊഴിയെടുക്കുമെന്നു സൂചനയുണ്ട്. ഇവിടെ ചെലവഴിച്ച ഫണ്ട്, അതില്‍ കുഴല്‍പണത്തിന്റെ സാന്നിധ്യം എന്നിവ സംബന്ധിച്ചുള്ള വിവരശേഖരണമാണു ലക്ഷ്യമിടുന്നത്.