ടൂറിന്‍: യൂറോപ്പ ലീഗില്‍ ഇന്ന് സെമി ഫൈനല്‍ ആദ്യപാദ പോരാട്ടങ്ങള്‍. യുവന്തസ് സ്വന്തം വേദിയില്‍ സെവിയെയുമായി കളിക്കുമ്പോള്‍ രണ്ടാം സെമിയില്‍ റോമ ബയര്‍ ലെവര്‍കൂസണുമായി കളിക്കും. വന്‍കിടക്കാരായ ബാര്‍സിലോണയും മാഞ്ചസ്റ്റര്‍ യുനൈറ്റഡുമെല്ലാ പാതി വഴിയില്‍ പുറത്തായിരിക്കെ യുവന്തസിന് സീസണിലെ ഏക കിരീട പ്രതീക്ഷ യൂറോപ്പയിലാണ്.
സിരിയ കിരീടത്തില്‍ നാപ്പോളിക്കാര്‍ മുത്തമിട്ടു. ഇറ്റാലിയന്‍ കപ്പിലും സ്ഥാനമില്ല. പലവിധ പ്രയാസങ്ങള്‍ നേരിട്ട സീസണില്‍ ഒരു വന്‍കരാ കിരീടമെന്നത് യുവന്തസിന് വലിയ ആത്മവിശ്വാസമാവും. പക്ഷേ ഫൈനലിലെത്താന്‍ സെവിയെക്കാരെ വീഴ്ത്തണം. പഴയ പുലിപ്പടയല്ല സെവിയെ. സ്പാനിഷ് ലീഗില്‍ തന്നെ വളരെ താഴെ നില്‍ക്കുന്നവര്‍. രണ്ടാം സെമിയില്‍ റോമ സിരിയയിലെ കരുത്തുമായാണ് വരുന്നത്. ബുണ്ടസ് ലിഗ് സംഘമായ ലെവര്‍കൂസണ്‍ നിരയില്‍ യുവതാരങ്ങളാണ് എന്നത് ഇറ്റാലിയന്‍ സംഘത്തിന് മുന്നറിയിപ്പാണ്. മല്‍സരങ്ങള്‍ രാത്രി 12-30 മുതല്‍ ടെന്‍ ചാനലുകളില്‍.