നാളെ പോളിംഗ് നടക്കുന്ന പുതുപ്പള്ളിയില്‍ യുഡിഎഫ് മുന്നണി വളരെ വലിയ ഭൂരിപക്ഷത്തില്‍ വിജയിക്കുമെന്ന് മുസ്‌ലിം ലീഗ് സംസ്ഥാന ജനറല്‍ സെക്രട്ടറി പി.എം.എ സലാം. മലപ്പുറത്ത് മാധ്യമങ്ങളുമായി സംസാരിക്കുകയായിരുന്നു അദ്ദേഹം. സാദിക്കലി തങ്ങളും പി കെ കുഞ്ഞാലിക്കുട്ടിയും തുടങ്ങി പാര്‍ട്ടിയുടെ എല്ലാ മുതിര്‍ന്ന നേതാക്കളും പുതുപ്പള്ളിയില്‍ പ്രചരണത്തിന് പോയിരുന്നു. പ്രവര്‍ത്തകരുടെയും ജനങ്ങളുടെയും ആത്മവിശ്വാസവും പ്രതികരണവും കാണുമ്പോള്‍ മികച്ച രീതിയിലുള്ള വിജയം യുഡിഎഫ് സ്ഥാനാര്‍ത്ഥി ചാണ്ടി ഉമ്മന്‍ ഉറപ്പാണെന്ന് അദ്ദേഹം പറഞ്ഞു.
ഈ വിജയം കേരളത്തിന്റെ ദുര്‍ഭരണത്തിനെതിരെയുള്ള വിധിയെഴുത്താകും. ഈ ഉപതിരഞ്ഞെടുപ്പ് സര്‍ക്കാരിനെ ജനങ്ങള്‍ വിലയിരുത്തുമെന്ന് മുഖ്യമന്ത്രി തന്നെ പറഞ്ഞതാണ്. എന്നാല്‍ തൃക്കാക്കരയില്‍ എന്താണോ സംഭവിച്ചത് അതുതന്നെയായിരിക്കും പുതുപ്പള്ളിയിലും സംഭവിക്കുക അദ്ദേഹം പറഞ്ഞു.
അതേസമയം ഇന്ത്യയില്‍ പ്രതീക്ഷയുള്ള ഒരു മുന്നണിയായി ഇന്ത്യ വളരുന്നു. അതില്‍ മുസ്‌ലിം ലീഗിന് കൃത്യമായ സ്ഥാനവും പരിഗണനയും കിട്ടിയിട്ടുണ്ട്. ഇന്ത്യ എന്ന മുന്നണി ഇന്ത്യന്‍ ജനാധിപത്യത്തിനും മതേതരത്വത്തിനും പ്രതീക്ഷയുള്ള ഒരു കാര്യമാവുമെന്നും വര്‍ഗീയതയും മതങ്ങളുടെ പേരിലുള്ള സംഘര്‍ഷങ്ങളും ഉണ്ടാക്കുന്ന ഇന്നത്തെ ഗവണ്‍മെന്റിനെ താഴെയിറക്കാന്‍ ഇന്ത്യ എന്ന മുന്നണിക്ക് ആകുമെന്നും അദ്ദേഹം പറഞ്ഞു.