കോഴിക്കോട്: സംഘടനാ ശാക്തീകരണത്തിന്റെ ഭാഗമായി മുസ്‌ലിംലീഗ് സംസ്ഥാന കമ്മിറ്റി സംഘടിപ്പിക്കുന്ന എക്‌സിക്യൂട്ടീവ് ക്യാമ്പുകള്‍ വിവിധ ജില്ലകളില്‍ ഈ മാസം 30 മുതല്‍ ആരംഭിക്കും. ജില്ലാ ഭാരവാഹികള്‍, ജില്ലകളില്‍ നിന്നുള്ള സംസ്ഥാന ഭാരവാഹികള്‍, മണ്ഡലം പ്രസിഡണ്ട്, ജനറല്‍ സെക്രട്ടറിമാര്‍, പോഷക സംഘടനകളുടെ സംസ്ഥാന ഭാരവാഹികള്‍, ജില്ലാപ്രസിഡണ്ട്, ജനറല്‍ സെക്രട്ടറിമാര്‍, പാര്‍ട്ടിയുടെ സംസ്ഥാന കൗണ്‍സില്‍ അംഗങ്ങള്‍ എന്നിവരാണ് ക്യാമ്പുകളില്‍ പങ്കെടുക്കുന്നത്.
കൊല്ലം ജില്ലാ ക്യാമ്പ് 30 ന് വൈകീട്ട് 3 മണിക്ക് അഷ്ടമുടിയില്‍ സംസ്ഥാന ജനറല്‍ സെക്രട്ടറി അഡ്വ പി.എം.എ സലാം ഉദ്ഘാടനം ചെയ്യും. തിരുവനന്തപുരം ജില്ലാ എക്‌സിക്യൂട്ടീവ് ക്യാമ്പും ഇടുക്കി ജില്ലാ കമ്മിറ്റിയുടെ സമ്പൂര്‍ണ കൗണ്‍സില്‍ മീറ്റും മെയ് ഒന്നിന് നടക്കും. മലപ്പുറം ക്യാമ്പ് മെയ് എട്ടിനും കോഴിക്കോട് ക്യാമ്പ് രണ്ടു ഘട്ടങ്ങളിലായി മെയ് 3,4,9,10 തിയതികളിലും നടക്കും.