ലക്‌നൗ: ദളിതരുടെ വീട് സന്ദര്‍ശിക്കുന്നതിലൂടെ ബി.ജെ.പി നേതാക്കള്‍ അവരെ അനുഗ്രഹിക്കുകയാണെന്ന് യു.പി മന്ത്രി രാജേന്ദ്ര പ്രതാപ് സിങ്. ‘ശബരി നേദിച്ച പഴം ഭക്ഷിച്ച് ശ്രീരാമന്‍ അവരെ അനുഗ്രഹിച്ചതു പോലെ ദളിതുകളുടെ വീടുകള്‍ സന്ദര്‍ശിക്കുന്നതിലൂടെ ബി.ജെ.പി നേതാക്കള്‍ അവരെ അനുഗ്രഹിക്കുകയാണ്.’-സിങ് പറഞ്ഞു. ഝാന്‍സി ജില്ലയിലെ ഗധ്മാവു ഗ്രാമത്തിലെ ഒരു ദളിത് സമുദായാംഗത്തിന്റെ വീട്ടില്‍ അത്താഴം കഴിക്കാന്‍ പോകുന്നതിന് മുമ്പായാണ് അദ്ദേഹം ഇത്തരമൊരു പരാമര്‍ശം നടത്തിയത്.
‘ഞാന്‍ ഒരു ക്ഷത്രിയനാണ്. സമുദായത്തിന്റെയും സമൂഹത്തിന്റെയും സുരക്ഷക്ക് വേണ്ടി പ്രവര്‍ത്തിക്കുക എന്നത് എന്റെ രക്തത്തിലുള്ളതാണ്. ഞങ്ങള്‍ക്ക് ദിശാബോധം തന്നതിന് പ്രധാനമന്ത്രി നരേന്ദ്ര മോദിയോട് നന്ദി അറിയിക്കാന്‍ ഞാന്‍ ആഗ്രഹിക്കുകയാണ്. ഈ ആളുകളുടെ (ദളിത്) സ്‌നേഹവും സന്തോഷവും നിങ്ങള്‍ക്ക് കാണാന്‍ സാധിക്കും’- ദളിത് സമുദായാംഗത്തിന്റെ വീട്ടില്‍ നിന്ന് ഭക്ഷണം കഴിച്ച ശേഷം സിങ് പറഞ്ഞു.
അടുത്ത വര്‍ഷം ലോക്‌സഭാ തെരഞ്ഞെടുപ്പ് നടക്കാനിരിക്കെ പ്രതിച്ഛായ മെച്ചപ്പെടുത്തുന്നതിന്റെ ഭാഗമായി ആര്‍.എസ്.എസ് നിര്‍ദേശ പ്രകാരമാണ് മുഖ്യമന്ത്രി യോഗി ആദിത്യനാഥ് ഉള്‍പ്പെടെയുള്ള നേതാക്കള്‍ ദളിത് വീടുകള്‍ സന്ദര്‍ശിക്കാനും അവിടെ നിന്ന് ഭക്ഷണം കഴിക്കാനും തുടങ്ങിയത്. രാജ്യവ്യാപകമായി ബി.ജെ.പിക്കെതിരെ ഉയരുന്ന ദളിത് രോഷം തണിപ്പിക്കാനുള്ള നീക്കത്തിന്റെ ഭാഗമായാണ് സന്ദര്‍ശം. ഇത്തരം മുഖം മിനുക്കലുകള്‍ക്കിടയിലും ബി.ജെ.പിയുടെ ദളിത് വിരുദ്ധത ശക്തമാണ് എന്നതിന്റെ തെളിവാണ് മന്ത്രിയുടെ പ്രസ്താവന.