വരാനിരിക്കുന്ന ലോകകപ്പ് പ്ലേ ഓഫ് മത്സരത്തിന് മുന്നോടിയായി ക്രിസ്റ്റ്യാനോ റൊണാള്‍ഡോക്ക് മുന്നറിയിപ്പുമായി ഇറ്റാലിയന്‍ താരം ലിയനാഡോ ബൊനൂച്ചി. ഇറ്റലിയും പോര്‍ച്ചുഗലും പ്ലേ ഓഫില്‍ ഏറ്റുമുട്ടുകയാണെങ്കില്‍ മത്സരത്തിനിടെ സൂപ്പര്‍ താരം ക്രിസ്റ്റ്യാനോക്ക് ഒരുപാട് ഇടി ലഭിക്കുമെന്ന് ബൊനൂച്ചി തുറന്നുപറഞ്ഞു. രണ്ട് പേരും ഇറ്റാലിയന്‍ ലീഗില്‍ 3 വര്‍ഷം യുവന്റസിന് വേണ്ടി ബൂട്ട് കെട്ടിയവരാണ്.
ക്രിസ്റ്റ്യാനോയുമായി താന്‍ ഇറ്റലി-പോര്‍ച്ചുഗല്‍ മത്സരത്തെപറ്റി സംസാരിച്ചിരുന്നെന്നും ക്രിസ്റ്റ്യാനോ ആ മത്സരത്തില്‍ ഇടി വാങ്ങിക്കൂട്ടുമെന്നത് എന്നുറപ്പാണെന്നും ബൊനൂച്ചി പറഞ്ഞു. അടുത്ത വര്‍ഷം നടക്കുന്ന ഖത്തര്‍ ലോകകപ്പിലേക്ക് 4 ടീമുകള്‍ ഉള്ള ഗ്രൂപ്പില്‍ നിന്ന് ഏതെങ്കിലും ഒരു ടീമിന് മാത്രമെ യോഗ്യത നേടാന്‍ സാധിക്കു. പ്ലേ ഓഫ് സെമിയില്‍ നോര്‍ത്ത് മാസിഡോണിയ ഇറ്റലിയെയും തുര്‍ക്കി പോര്‍ച്ചുഗലിനെയുമാണ് നേരിടുക. ഇതില്‍ വിജയിക്കുന്നവര്‍ തമ്മില്‍ നടക്കുന്ന മത്സരത്തിലെ വിജയിക്കാണ് ഖത്തര്‍ ലോകകപ്പിലേക്കുള്ള ടിക്കറ്റ് ലഭിക്കുക.