ലൈംഗികാതിക്രമ കേസില്‍ സിദ്ദിഖിന് ഹൈക്കോടതി ജാമ്യം നിഷേധിച്ചതിന് പിന്നാലെ നടന്‍ ഒളിവില്‍. വിധി വന്നതിനുശേഷം കൊച്ചിയിലെ ഹോട്ടലില്‍ നിന്നും സിദ്ദിഖ് കടന്നുകളഞ്ഞതായാണ് വിവരം. സ്വന്തം വാഹനം ഉപേക്ഷിച്ച് സുഹൃത്തുക്കളുടെ വാഹനത്തിലായിരുന്നു യാത്ര. ഒളിവില്‍ കഴിയുന്നത് കേരളത്തിലാണെന്ന വിവരങ്ങളും പുറത്തുവരുന്നുണ്ട്.
നേരത്തെ നടിയെ ആക്രമിച്ച കേസുമായി ബന്ധപ്പെട്ട് നടന്‍ ദിലീപ് മുന്‍കൂര്‍ജാമ്യാപേക്ഷ സമര്‍പ്പിച്ച സാഹചര്യത്തില്‍ നടന്റെ ആലുവയിലെ വീടിനു സമീപത്തുതന്നെയുണ്ടായിരുന്നു പോലീസ്. ജാമ്യാപേക്ഷ ഒഴിവാക്കുന്ന സാഹചര്യമുണ്ടായാല്‍ ദിലീപിനെ അറസ്റ്റ് ചെയ്യാനായിരുന്നു നീക്കം. ദിലീപ് ഒളിവില്‍ പോകാതിരിക്കാന്‍ അന്ന് പോലീസ് ശ്രദ്ധിച്ചിരുന്നു. എന്നാല്‍ സിദ്ദിഖിന്റെ കാര്യത്തില്‍ ഇത്തരമൊരു ജാഗ്രത പോലീസിനുണ്ടായിട്ടില്ല.
സിനിമാമേഖലയില്‍ സ്ത്രീകള്‍ നേരിടുന്ന പ്രശ്‌നങ്ങളെക്കുറിച്ച് പഠിച്ച ജസ്റ്റിസ് കെ. ഹേമ കമ്മിറ്റി റിപ്പോര്‍ട്ടില്‍ അഞ്ചുവര്‍ഷക്കാലം സര്‍ക്കാര്‍ നടപടിസ്വീകരിക്കാത്തത് നിഗൂഢമെന്ന് ഹൈക്കോടതി ചൂണ്ടിക്കാട്ടിയിരുന്നു. 2019-ല്‍ റിപ്പോര്‍ട്ട് ലഭിച്ചിട്ടും വിശദീകരിക്കാന്‍ ബുദ്ധിമുട്ടുള്ള മൗനമാണ് സര്‍ക്കാര്‍ സ്വീകരിച്ചതെന്നാണ് കോടതി പറഞ്ഞത്.
റിപ്പോര്‍ട്ട് അടച്ചുപൂട്ടിവെച്ചതിന്റെ ശരിതെറ്റുകളും ഇപ്പോള്‍ സ്വീകരിക്കുന്ന നടപടികളും ഹൈക്കോടതിയുടെ ഡിവിഷന്‍ ബെഞ്ച് പരിശോധിക്കുന്നുണ്ട്. അതിനാല്‍ കൂടുതല്‍ പറയുന്നില്ലായെന്നാണ് കോടതി പറഞ്ഞത്.