ന്യൂഡല്‍ഹി: ഐ.എസ്.ആര്‍.ഒ ചാരക്കേസ് അന്വേഷിച്ച ഉദ്യോഗസ്ഥര്‍ക്കെതിരെ സി.ബി.ഐ അന്വേഷണം വേണ്ടെന്ന് സുപ്രീം കോടതി. സി.ബി.ഐ അന്വേഷിക്കേണ്ട സാഹചര്യം ഇല്ലെന്നും ഉദ്യോഗസ്ഥര്‍ക്കെതിരെ ക്രിമിനല്‍ പ്രോസിക്യൂഷന് നിര്‍ദേശം നല്‍കാനാവില്ലെന്നും കോടതി നിരീക്ഷിച്ചു.
സംസ്ഥാന സര്‍ക്കാരിന്റെ ചാരക്കേസില്‍നിന്നും കുറ്റ വിമുക്തനാക്കപ്പെട്ട ശാസ്ത്രജ്ഞന്‍ നമ്പി നാരായണന് നഷ്ടപരിഹാരം ആദ്യം സംസ്ഥാന സര്‍ക്കാര്‍ നല്‍കണം. കുറ്റക്കാരെന്ന് കണ്ടെത്തുന്ന ഉദ്യോഗസ്ഥരില്‍നിന്ന് പിന്നീട് ഈ തുക ഈടാക്കണമെന്നും കോടതി നിര്‍ദേശിച്ചു. നമ്പി നാരായണനെ പ്രതിയാക്കിയ അന്വേഷണ ഉദ്യോഗസ്ഥര്‍ അവരുടെ വീട് വിറ്റാണെങ്കിലും നഷ്ടപരിഹാരം നല്‍കണമെന്ന് കോടതി അഭിപ്രായപ്പെട്ടു.
നമ്പി നാരായണനെ കേസില്‍ കുടുക്കിയവരെ കുറിച്ച് കൂടുതല്‍ അന്വേഷണം വേണം. ഈ അന്വേഷണം നടത്താന്‍ തയ്യാറാണെന്നും സി.ബി.ഐ സുപ്രിം കോടതിയില്‍ അറിയിച്ചു. ചാരക്കേസില്‍ കുടുക്കിയ ഉദ്യോഗസ്ഥരെ കണ്ടെത്താന്‍ അന്വേഷണം വേണമെന്ന നമ്പി നാരായണന്റെ ഹര്‍ജിയില്‍ സി.ബി.ഐ നിലപാട് അറിയിച്ചത്.
കേസില്‍ തനിക്ക് നഷ്ടപരിഹാരമല്ല വേണ്ടതെന്നും കുറ്റക്കാര്‍ക്കെതിരെ ശക്തമായ നടപടിയാണ് വേണ്ടതെന്നു നമ്പി നാരായണന് ഇന്നലെ മാധ്യമ പ്രവര്‍ത്തകരോട് പറഞ്ഞിരുന്നു. ചീഫ്ജസ്റ്റിസ് ദീപക് മിശ്ര അദ്ധ്യക്ഷനായ മൂന്നംഗ ബെഞ്ചാണ് നമ്പി നാരായണന്റെ ഹര്‍ജി പരിഗണിച്ചത്.