തൃശൂര്‍: ഓടിക്കൊണ്ടിരുന്ന ലോറിയില്‍ നിന്ന് ഇരുമ്പുഷീറ്റ് റോഡിലേക്ക് തെറിച്ചുവീണ് വഴിയാത്രക്കാരായ രണ്ടു പേര്‍ മരിച്ചു. പുന്നയൂര്‍ക്കുളം അകലാട് മഠത്തിപ്പറമ്പില്‍ മുഹമ്മദാലി ഹാജി (70), കിഴക്കേ തലക്കല്‍ ഷാജി (40) എന്നിവരാണ് മരിച്ചത്. അകലാട് സ്‌കൂളിനു സമീപമാണ് അപകടം. കെട്ട് പൊട്ടി ഷീട്ടുകള്‍ റോഡില്‍ വീഴുകയായിരുന്നു.
ഷീറ്റുകള്‍ കൊണ്ടുവന്നത് മതിയായ സുരക്ഷയില്ലാതെയെന്നാണ് വിവരം. സംഭവത്തിനു പിന്നാലെ ലോറി ഡ്രൈവര്‍ ഓടി രക്ഷപ്പെട്ടു. സുബഹി നമസ്‌കാരം കഴിഞ്ഞ് ബന്ധുവീട്ടിലേക്ക് പോകാന്‍ റോഡിനു കിഴക്കുഭാഗത്ത് ബസ് കാത്തുനില്‍ക്കുകയായിരുന്ന മുഹമ്മദാലി ഇതേ ദിശയിലേക്ക് പോവുകയായിരുന്ന ഷാജിയുടെ സ്‌കൂട്ടറില്‍ കയറുന്നതിനിടെയാണ് അപകടമുണ്ടായത്. ഇരുവരും തല്‍ക്ഷണം മരിച്ചു.