തെഹ്രാന്‍: ഇറാനിലെ ദേശീയ ഗുസ്തി ചാമ്പ്യനായ നവിദ് അഫ്കാരിയെ തൂക്കിക്കൊന്നതായി റിപ്പോര്‍ട്ട്. 2018 ല്‍ നടന്ന സര്‍ക്കാര്‍ വിരുദ്ധ പ്രക്ഷോഭത്തിനിടെ സെക്യൂരിറ്റി ഉദ്യോസ്ഥനെ കുത്തിക്കൊലപ്പെടുത്തിയെന്ന കുറ്റത്തിനാണ് നവിദ് അഫ്കാരിയെ തൂക്കിലേറ്റിയതെന്ന് ദി ഗാര്‍ഡിയന്‍ റി്‌പ്പോര്‍ട്ടുചെയ്യുന്നു.
തെക്കന്‍ നഗരമായ ഷിറാസില്‍ വെച്ച് നവിദ് അഫ്കാരിയെ തൂക്കിക്കൊന്നത്. അതേസമയം, അഫ്കാരിക്കെതിരെ അധികൃതര്‍ അന്യായമായികുറ്റം ചുമത്തുകയായിരുന്നു എന്ന് വ്യാപക വിമര്‍ശനം ഉയരുന്നുണ്ട്. അഫ്കാരിയുടെ വധശിക്ഷയ്ക്കെതിരെ നേരത്തെ ലോകത്തിന്റെ വിവിധ ഭാഗങ്ങളില്‍ നിന്നുള്ള 85000 കായിക താരങ്ങള്‍ സംയുക്ത പ്രതിഷേധത്തിലേര്‍പ്പെട്ടിരുന്നു. എന്നാല്‍ വധശിക്ഷ നടപ്പാക്കിയതോടെ അന്താരാഷ്ട്ര തലത്തില്‍ വ്യാപക പ്രതിഷേധമാണ് ഉയരുന്നത്.
തന്നെ നിര്‍ബന്ധിതമായി കുറ്റം സമ്മതിപ്പിക്കുകയായിരുന്നു എന്ന് അഫ്കാരി നേരത്തെ വ്യക്തമാക്കിയിരുന്നു. ഇദ്ദേഹത്തെ പാര്‍പ്പിച്ച ജയിലില്‍ നിന്നും ലീക്കായ ശബ്ദരേഖയില്‍ തന്നെ പൊലീസ് നിരന്തരം ഉപദ്രവിക്കുകയും കുറ്റം സമ്മതിപ്പിക്കുകയുമായിരുന്നെന്നാണ് അഫ്കാരി പറയുന്നത്.
സമാന കേസില്‍ അഫ്കാരിയുടെ സഹോദരങ്ങളെയും ഇറാന്‍ കോടതി ശിക്ഷിച്ചിട്ടുണ്ട്. സഹോദരങ്ങളായ വഹിദും ഹബിബും യഥാക്രമം 54 വര്‍ഷത്തേക്കും 27 വര്‍ഷത്തേക്കും ജയില്‍ ശിക്ഷ അനുഭവിക്കുകയാണ്.