കൊല്‍ക്കത്ത: അഹമ്മദാബാദിലായിരുന്നല്ലോ റിങ്കുസിംഗ് മാജിക്. ഗുജറാത്ത് ടൈറ്റന്‍സിനെ കൊല്‍ക്കത്ത നൈറ്റ് റൈഡേഴ്‌സ് വിറപ്പിച്ച ആ കാഴ്ച്ച ഈഡനിലെ കൊല്‍ക്കത്താ അനുകൂലികള്‍ക്ക് നേരില്‍ കാണാന്‍ കഴിഞ്ഞിരുന്നില്ല. ഇന്ന് അവരുടെ തട്ടകത്താണ് പോരാട്ടം. പ്രതിയോഗികള്‍ സണ്‍റൈസേഴ്‌സ് ഹൈദരാബാദ്.
രാജസ്ഥാന്‍ റോയല്‍സ് ഒന്നാം സ്ഥാനത്ത് നില്‍ക്കുന്ന പോയിന്റ് ടേബിളില്‍ മൂന്നാം സ്ഥാനത്താണ് നിതിഷ് റാണയും സംഘവും. കളിച്ച മൂന്ന് മല്‍സരങ്ങളിലും രണ്ടിലും വിജയം. ആന്ദ്രെ റസല്‍, റിങ്കുസിംഗ്, സുനില്‍ നരേന്‍ തുടങ്ങിയ കൂറ്റനടിക്കാരില്‍ തന്നെ ടീമിന്റെ വിശ്വാസം. കളിച്ച മൂന്ന് മല്‍സരങ്ങളില്‍ ഒന്നില്‍ മാത്രം ജയിച്ചവരാണ് ഹൈദരാബാദ്. ഐദന്‍ മാര്‍ക്്‌റാം നയിക്കുന്ന സംഘത്തിന് ഈഡനില്‍ കൊല്‍ക്കത്തയെ തോല്‍പ്പിക്കുക എന്നത് എളുപ്പമുള്ള ജോലിയാവില്ല. ശരാശരി മികവാണ് അവര്‍ പുലര്‍ത്തുന്നത്. ബാറ്റിംഗില്‍ വിശ്വാസ്യത പുലര്‍ത്താനാവുന്നില്ല. ബൗളിംഗില്‍ പക്ഷേ ഉംറാന്‍ മാലിക്കിനെ പോലുള്ളവര്‍ ഫോമിലെത്തിയിട്ടുമില്ല.