ലക്‌നൗ: രാജസ്ഥാന്‍ റോയല്‍സുകാരെ മറിച്ചിട്ട ലക്‌നൗ സൂപ്പര്‍ ജയന്റസിന് ഇന്ന് സ്വന്തം വേദിയില്‍ ചാമ്പ്യന്മാരായ ഗുജറാത്ത് ടൈറ്റന്‍സ് പ്രതിയോഗികള്‍. മല്‍സരം വൈകീട്ട് 3-30 ന്. രാത്രി പോരാട്ടത്തില്‍ വാംഖഡെയില്‍ മുന്‍ ചാമ്പ്യന്മാരായ പഞ്ചാബ് കിംഗ്‌സുമായി കളിക്കും. നിലവില്‍ പോയിന്റ് ടേബിളില്‍ റോയല്‍സിന് പിറകില്‍ രണ്ടാമതാണ് ലക്‌നൗ. ഇന്ന് സ്വന്തം വേദിയില്‍ ജയിക്കാനായാല്‍ കെ.എല്‍ രാഹുലിന്റെ സംഘത്തിന് ഒന്നാം സ്ഥാനം നേടാനാവും. ഇന്ന് ക്വിന്റണ്‍ ഡി കോക്കിന് ടീമിലിടമുണ്ടാവുമോ എന്നതാണ് ആരാധകരുടെ ചോദ്യം. ടീമിലെത്തിയിട്ടും ദക്ഷിണാഫ്രിക്കയുടെ മുന്‍ നായകന് ഇത് വരെ പ്ലെയിംഗ് ഇലവനില്‍ അവസരം കിട്ടിയിട്ടില്ല. തുടക്കത്തിലെ വിജയങ്ങള്‍ക്ക്് ശേഷം ഹാര്‍ദിക് പാണ്ഡ്യയുടെ ഗുജറാത്ത് തുടര്‍ച്ചയായി തോറ്റു. നാലാം സ്ഥാനത്താണിപ്പോള്‍.
വിജയ വഴിയില്‍ തിരികെയെത്തിയ ആത്മവിശ്വാസത്തിലാണ് മുംബൈ. കളിച്ച അഞ്ച് മല്‍സരത്തില്‍ മൂന്നിലും ജയിച്ച് ഇപ്പോല്‍ ആറാം സ്ഥാനത്താണ് രോഹിത് ശര്‍മയുടെ ടീം. അര്‍ജുന്‍ ടെണ്ടുല്‍ക്കര്‍ തന്നെ ഇന്നും പുതിയ പന്തില്‍ വരുമ്പോള്‍ ടീമില്‍ വലിയ മാറ്റങ്ങള്‍ക്ക് സാധ്യതയില്ലെന്ന സുചനയാണ് നായകന് നല്‍കിയത്. പരുക്കില്‍ നിന്നും മുക്തനായ ജോഫ്രെ ആര്‍ച്ചര്‍ ഇന്നലെ പരിശീലനത്തിനുണ്ടായിരുന്നു. പക്ഷേ ഇന്ന് അദ്ദേഹം ആദ്യ ഇലവനിലുണ്ടാവുമോ എന്നുറപ്പില്ല. കളിക്കാന്‍ തനിക്ക് അതിയായ ആഗ്രഹമുണ്ടെന്ന് ഇംഗ്ലീഷ് സീമര്‍ വ്യക്തമാക്കിയിട്ടുണ്ട്.