ഹൈദരാബാദ്: ജയിച്ചാല്‍ പ്ലേ ഓഫ് സജീവമാവുന്ന ബെംഗളുരു റോയല്‍ ചാലഞ്ചേഴ്‌സിന് ഇന്ന് സണ്‍റൈസേഴസുമായി നിര്‍ണായക അങ്കം. ഗുജറാത്ത് ടൈറ്റന്‍സ് മാത്രം അവസാന നാല് ഉറപ്പിച്ച ചാമ്പ്യന്‍ഷിപ്പില്‍ ഇന്ന് ജയിച്ചാല്‍ ബെംഗളുരു സംഘത്തിന് 14 പോയിന്റാവും. നിലവിലെ അഞ്ചാം സ്ഥാനത്തില്‍ നിന്നും നാലാം സ്ഥാനത്തേക്ക് കയറാം. പിന്നെയും ഒരു മല്‍സരം ബാക്കിയുണ്ടാവും- അതും ജയിക്കാനായാല്‍ പ്ലേ ഓഫ് വഴി എളുപ്പമാവും. ഹൈദരാബാദിനിത് പതിമൂന്നാമത് മല്‍സരമാണ്.
ഇതിനകം ചാമ്പ്യന്‍ഷിപ്പില്‍ നിന്നും പുറത്തായ അവര്‍ക്ക് നഷ്ടപ്പെടാന്‍ ഒന്നുമില്ല. അവസാന മല്‍സരത്തില്‍ രാജസ്ഥാന്‍ റോയല്‍സിനെ 112 റണ്‍സിന് കശക്കി റണ്‍റേറ്റ് ഉയര്‍ത്തിയ ബെംഗളുരു സംഘത്തിന് വര്‍ധിത ആത്മവിശ്വാസമുണ്ട്. നായകന്‍ ഫാഫ് ഡുപ്ലസി, ഗ്ലെന്‍ മാക്‌സ്‌വെല്‍ എന്നിവര്‍ മികച്ച ഫോമില്‍ നില്‍ക്കുമ്പോള്‍ പ്രതീക്ഷകൡലാണ് ഉദ്യാന സംഘം. മല്‍സരം രാത്രി 7-30 മുതല്‍.