മുംബൈ: രോഹിത് ശര്‍മയുടെ മുംബൈ ഇന്ത്യന്‍സ് ഇന്ന് ഐ.പി.എല്‍ സീസണിലെ അഞ്ചാം മല്‍സരത്തിന്. ഒരു മല്‍സരം പോലും ജയിക്കാനാവാതെ പോയിന്റ് ടേബിളില്‍ അവസാന സ്ഥാനത്ത് നില്‍ക്കുന്ന ടീമിന് ഇന്നെങ്കിലും ഒരു ജയം നേടാനാവുമെന്നാണ് ആരാധകരുടെ പ്രതീക്ഷ.
മായങ്ക് അഗര്‍വാള്‍ നയിക്കുന്ന പഞ്ചാബ് കിംഗ്‌സാണ് പ്രതിയോഗികള്‍. ബാറ്റര്‍മാരാണ് മുംബൈ തലവേദന. നായകന്‍ രോഹിത് ഉള്‍പ്പെടെ ആര്‍ക്കും വലിയ സ്‌ക്കോര്‍ സമ്പാദിക്കാനാവുന്നില്ല. സൂര്യകുമാര്‍ യാദവ് പരുക്കില്‍ നിന്ന് മുക്തനായി തിരികെ വന്ന ശേഷം ഗംഭീരമായി കളിക്കുന്നുണ്ട്. പക്ഷേ അദ്ദേഹത്തിന് ശക്തമായ പിന്തുണ നല്‍കാന്‍ ആരുമില്ല. ബൗളിംഗില്‍ ജസ്പ്രീത് ബുംറ കരുത്തനായി പന്തെറിയുമ്പോഴും അതേ മികവ് നിലനിര്‍ത്താന്‍ ആരുമില്ല എന്നതും കോച്ച് മഹേല ജയവര്‍ധനയെ അലട്ടുന്ന കാര്യമാണ്.
കളിച്ച നാല് മല്‍സരങ്ങളില്‍ രണ്ടില്‍ ജയിച്ചിട്ടുണ്ട് പഞ്ചാബ്. മായങ്കിനൊപ്പം ഇംഗ്ലിഷ് ബാറ്റര്‍ ലിയാം ലിവിങ്സ്റ്റണാണ് ടീമിന്റെ ബാറ്റിംഗ് തുരുപ്പ് ചീട്ട്. ശിഖര്‍ ധവാന്‍ നല്ല തുടക്കം നല്‍കിയാല്‍ അത ഉപയോഗപ്പെടുത്താന്‍ ജോണി ബെയര്‍സ്‌റ്റോയെ പോലുള്ളവരുമുണ്ട്. മല്‍സരം രാത്രി 7-30 ന്.