ആദ്യ മല്‍സരത്തില്‍ തകര്‍ന്നുപോയ ഡേവിഡ് വാര്‍ണറുടെ ഡല്‍ഹി ക്യാപിറ്റല്‍സിന് മുന്നില്‍ ഇന്ന് ചാമ്പ്യന്മാരായ ഗുജറാത്ത് ടൈറ്റന്‍സ്. ഉദ്ഘാടന അങ്കത്തില്‍ ചെന്നൈ സൂപ്പര്‍ കിംഗ്‌സിനെ കശക്കി ടൈറ്റന്‍സ് ഉജ്ജ്വല ഫോമില്‍ നില്‍ക്കുമ്പോള്‍ റിക്കി പോണ്ടിംഗ് പരിശീലിപ്പിക്കുന്ന സംഘത്തിന് കാര്യങ്ങള്‍ എളുപ്പമാവില്ല. ആദ്യ മല്‍സരത്തിലെ പ്രകടനത്തില്‍ സംതൃപ്തനല്ല പോണ്ടിംഗ്.
വാര്‍ണര്‍ അര്‍ധശതകം നേടിയെങ്കിലും മറ്റുള്ളവര്‍ നിരാശപ്പെടുത്തി. ആദ്യ മല്‍സരത്തില്‍ ലക്‌നൗ സൂപ്പര്‍ ജയന്റസ് ആദ്യം ബാറ്റ് ചെയ്ത് 193 ലെത്തിയപ്പോള്‍ വാര്‍ണറും സംഘവും ആകെ നേടിയത് 143 റണ്‍സായിരുന്നു. മിച്ചല്‍ മാര്‍ഷ്, സര്‍ഫ്രാസ് ഖാന്‍, പ്രിഥ്‌വി ഷാ, റോവ്മാന്‍ പവല്‍ എന്നിവരെല്ലാം ചെറിയ സ്‌ക്കോറിന് പുറത്തായിരുന്നു. അതേ സമയം ഹാര്‍ദിക് പാണ്ഡ്യയുടെ ഗുജറാത്ത് സംഘത്തില്‍ ശക്തരാണ് കളിക്കുന്നത്.
ആദ്യ മല്‍സരത്തില്‍ ചെന്നൈ സൂപ്പര്‍ കിംഗ്‌സിനെ ഗുജറാത്ത് തകര്‍ത്തത് ബാറ്റിംഗ് മികവിലായിരുന്നു. വൃദ്ധിമാന്‍ സാഹ, ശുഭ്മാന്‍ ഗില്‍, സായ് സുദര്‍ശന്‍, ഹര്‍ദിക് പാണ്ഡ്യ, റാഷിദ് ഖാന്‍ എന്നിവരെല്ലാം ചേര്‍ന്നപ്പോള്‍ നാല് പന്തുകള്‍ ബാക്കിനില്‍ക്കെയായിരുന്നു വിജയം. മുഹമ്മദ് ഷമി, റാഷിദ് ഖാന്‍, അല്‍സാരി ജോസഫ്, ഹാര്‍ദിക് പാണ്ഡ്യ എന്നിവര്‍ ബൗളിംഗിലും കരുത്തരാണ്. മല്‍സരം രാത്രി 7-30 മുതല്‍.